“Duke vizituar Ukrainën, Erdogan do të forcojë ndikimin e Turqisë”
Presidenti turk, Recep Tayyip Erdogan po udhëton në Ukrainë për një takim me presidentin Volodymyr Zelensky, gjatë së cilit do të nxjerrë në pah rolin e shumëanshëm të Ankarasë në luftën në Evropën Lindore.
Vizita, e caktuar për t'u zhvilluar në qytetin perëndimor të Ukrainës, Lviv, do të përfshijë gjithashtu sekretarin e përgjithshëm të Kombeve të Bashkuara Antonio Guterres, i cili më pas do të shkojë në qytetin port të Detit të Zi të Odesa-s dhe në Stamboll më 20 gusht.
Sipas The Independent, takimi në Lviv që do të mbahet të enjten do të fokusohet në përpjekjet për të nxjerrë importet e grurit jashtë vendit dhe për të krijuar siguri për centralin bërthamor të Ukrainës të kapur nga forcat ruse në konflikt.
E ndërsa industria e mbrojtjes e Turqisë i ka shitur Ukrainës pajisje kryesore ushtarake si dronët Bayraktar TB-2, udhëtimi i parë i Erdoganit në Ukrainë që nga fillimi i luftës vjen mes shqetësimeve se Ankaraja po i përshtatet shumë interesave të Kremlinit.
Kujtojmë se, në fillim të këtij muaji, Erdogan mori pjesë në një vizitë me dyer të mbyllura me presidentin Vladimir Putin në qytetin turistik të Soçit.
"Natyrisht që Erdogan ka shumë rol në lojë," tha Michael Bociurkiw, një analist i çështjeve globale me bazë në Kiev dhe bashkëpunëtor i lartë në Këshillin Atlantik, një institut kërkimi në Uashington.
“Ai po e pozicionon veten si një burrë shteti rajonal i aftë për të biseduar me liderët botërorë. Ai është në një pozicion unik – gjeografikisht, diplomatikisht dhe strategjikisht.”
Ndërkohë, zëdhënësi i OKB-së, Stephane Dujarric tha se takimet në Lviv do të fokusohen në konfliktin e përgjithshëm në Ukrainë, duke përfshirë kërcënimin e një fatkeqësie katastrofike në centralin bërthamor Zaporizhzhya të pushtuar nga Rusia, më i madhi në Evropë dhe skena e luftimeve intensive në javët e fundit.
Zelensky ka akuzuar Rusinë për përdorimin e objektit bërthamor me gjashtë reaktorë për të qëlluar me armë në pozicionet ukrainase, duke e ditur se Ukraina do të ishte e kujdesshme për të kundërpërgjigjur. Ndërsa, Moska i ka rezistuar thirrjeve për t'ia dorëzuar vendin inspektorëve bërthamorë të OKB-së.
Turqia thotë se takimi do të mbulojë të gjitha aspektet e marrëdhënieve midis Ankarasë dhe Kievit, si dhe "përfundimin e luftës Ukrainë-Rusi përmes rrugëve diplomatike".
Ndërsa Turqia përfiton diplomatikisht nga suksesi i dërgesave të grurit, ajo gjithashtu përfiton duke injoruar sanksionet perëndimore ndaj Moskës. Ajo vazhdon të mirëpresë kapitalin dhe qytetarinë ruse. E eksportet e Turqisë në Rusi janë rritur në nivelin më të lartë të tetë viteve dhe ministri i transportit i Ankarasë është mburrur hapur për një rritje të shitjeve të makinave në Rusi.
E përderisa perëndimi mbetet nervoz për përpjekjet e Turqisë për t'u angazhuar me Rusinë, Kievi mund të vlerësojë rolin e Erdogan si bashkëbisedues.
“Zelensky është i dëshpëruar për një marrëveshje paqeje dhe Ukraina mendon se lënia e kanaleve të komunikimit të hapura ndaj Moskës është absolutisht thelbësore”, tha Bociurkiw, duke shtuar se, “Erdogan po luan një rol që nuk mendoj se mund ta luajë as sekretari i përgjithshëm i OKB-së”.
