Ylli i ri i Barcelonës regjistrohet në kohë, i gatshëm për përballjen ndaj Las Palmas

Barcelona me sukses ka regjistruar nënshkrimin e ri, Vitor Roque. Si rrjedhojë, ai do të jetë i gatshëm për ndeshjen e sotme në La Liga ndaj Las Palmas.

Talenti fantastik brazilian, i cili mbërriti në Barcelonë në fund të dhjetorit, u përfshi në skuadrën e tyre për ndeshjen e Las Palmas, pavarësisht se nuk ishte ardhur ende njoftimi për regjistrimin në La Liga. Sulmuesi i ri ka nisur edhe stërvitjen me skuadrën kryesore pas një pushimi të shkurtër dimëror, pas lëvizjes së tij nga Athletico Paranaense.

Por të mërkurën, gjigantët katalanas konfirmuan se lojtari është regjistruar në ligë dhe ka të drejtë të bëjë debutimin e tij për kampionët në fuqi të La Liga të enjten në stadiumin Gran Canaria.

Pas mbërritjes në klub, 18-vjeçarit iu dorëzua fanela nr.19, një numër që legjenda e klubit Lionel Messi e kishte përdorur në ditët e para të karrierës së tij si lojtar. Argjentinasi mori numrin legjendar nr.10 pasi Ronaldinho u largua nga klubi.

Skuadra e Xavit, e cila tashmë është 10 pikë prapa liderëve të ligës Real Madrid dhe Girona, nuk mund të lejojë të humbasë më pikë nëse dëshiron të mbetet në garën për titull këtë sezon. Pas përballjes me Las Palmas, ata do të përballen me Barbastro në një ndeshje të raundit të 1/16 të Kupës së Mbretit të dielën.