Vdes në moshën 76-vjeçare ish-trajneri i Kombëtares së Anglisë
Ish-trajneri i Manchester Cityt e Kombëtares së Anglisë, Sven-Goran Eriksson, ka vdekur në moshën 76-vjeçare pasi humbi betejen me kancerin, siç ka konfirmuar familja e tij.
Eriksson, i cili drejtoi Anglinë mes viteve 2001 dhe 2006, ndërroi jetë të hënën në mëngjes. Suedezi kishte zbuluar diagnozën e tij terminale të kancerit pankreatik në janar, duke thënë se i kishte edhe një vit jetë në rastin më të mirë.
Në një deklaratë, familja e Eriksson tha: "Pas një sëmundjeje të gjatë, SGE vdiq në mëngjes në shtëpi i rrethuar nga familja. Vajtuesit më të afërt janë vajza Lina; djali Johan me gruan Amana dhe mbesën Sky; babai Sven; e dashura Yanisette me djalin Alcides; vëllai Lars-Erik me gruan Jumnong. Familja kërkon respekt për të mbajtur zi në mënyrë private dhe për të mos u kontaktuar."
Eriksson ishte trajneri i parë jo-britanik i Anglisë dhe udhëhoqi Tre Luanët në çerekfinalet e tre turneve të mëdha gjatë mandatit të tij pesëvjeçar, duke e lënë këtë rol pas Kupës së Botës 2006.
Në nivel klubesh ai drejtoi 12 skuadra të ndryshme - më së shumti në krye të Manchester Cityt dhe Lazios, ku fitoi 18 trofe gjatë një karriere fantastike.
Pak ditë më parë, Eriksson dha një mesazh emocionues lamtumirës për botën e futbollit, marrë nga dokumentari i Amazon Prime 'Sven'.
"Kam pasur një jetë të mirë. Mendoj se të gjithë kemi frikë nga dita kur vdesim, por jeta ka të bëjë edhe me vdekjen," thotë Eriksson në fund të dokumentarit. "Duhet të mësosh ta pranosh ashtu siç është. Shpresojmë që në fund njerëzit të thonë, po, ai ishte një njeri i mirë, por të gjithë nuk do ta thonë këtë. Shpresoj se do të më kujtoni si një djalë pozitiv që përpiqej të bënte gjithçka që mund të bënte. Mos t'iu vjen keq, buzëqeshni. Faleminderit për gjithçka, trajnerë, lojtarë, tifozë, ka qenë fantastike. Kujdesuni për veten dhe kujdesuni për jetën tuaj dhe jetojeni atë."
