Valbuena uron Benzeman pavarësisht skandalit të videos me përmbajtje seksuale: Jam i lumtur për të, ai e ka merituar
Mesfushori i Olympiacos, Mathieu Valbuena, e ka uruar fituesin e Topit të Artë, Karim Benzeman, pavarësisht se futbollisti i Real Madridit kohë më parë ishte shpallur fajtor për shantazh ndaj tij.
Benzema u kurorëzua fituesi i Topit të Artë të hënën mbrëma pas një sezoni mahnitës ku shënoi 44 gola për klubin e tij në të gjitha garat. Ai ka marrë lëvdata nga e gjithë bota e futbollit dhe Valbuena është bërë i fundit që ka hyrë në lojë - disi çuditërisht.
Duke folur për 90 Football , Valbuena tha: "Jam i lumtur për të, ai e meriton atë. Në jetë, duhet të jesh i sinqertë. Unë gjithmonë kam ditur të bëj dallimin mes futbollit dhe jashtë futbollit. Ai kishte një sezon të jashtëzakonshëm. Kur keni luajtur në një klub si Real Madrid për kaq shumë vite dhe jeni duke u paraqitur mirë, nuk do të ishte objektive nga unë të them se ai nuk e meriton atë."
Dyshja u përfshinë në një polemikë mbi një kasetë seksuale në vitin 2015, me Benzema që u shpall fajtor për përfshirje në vitin 2021. Ai vazhdon të deklarojë pafajësinë e tij, por braktisi përpjekjet për të përmbysur dënimin në qershor të vitit 2022 . Si rezultat i polemikave, Benzema nuk luajti për Francën për më shumë se gjashtë vjet, duke u kthyer vetëm në vitin 2021 për kampionët e botës në fuqi.
Pas sigurimit të titullit si lojtari më i mirë në botë, Benzema do të kërkojë ta vërtetojë këtë fakt pasi ai dhe Real Madridi presin Sevillan të shtunën në La Liga, për të mbajtur kryesimin e tabelës.
Ndërsa, 38-vjeçari është duke bërë karrierë në elitën e futbollit grek, ku paraqitet për skuadrën Olympiacos tash e tre sezone.
Karriera e tij është shumë e pasur, ku ndër vite është paraqitur për Marseillen, Lyonin, Fenerbahcen, e disa skuadra tjera, duke bërë në përgjithësi 652 paraqitje, me 83 gola të shënuar dhe 155 asistime.
