Ten Hag tregon se pse e zgjodhi Bruno Fernandesin kapiten të parë: Ai është një lojtar shembull në fushë
Trajneri i Manchester Unitedit, Erik ten Hag, ka thënë se Bruno Fernandes është një lojtar shembull dhe inspirim për të tjerët në fushë, duke shpjeguar arsyet se pse ka vendosur ta bëjë portugezin kapiten të ri të djajve të kuq.
Djajtë e kuq kanë bërë të ditur se mesfushori portugez do të jetë kapiteni i klubit për sezonin e ardhshëm. Fernandes kishte mbajtur tashmë shiritin në krah për pjesën më të madhe të sezonit të kaluar, ndërsa Harry Maguire u përpoq të arrinte një pozicion startues.
Ten Hag e etiketoi atë si një "shembull" dhe "pasqyrë" për shumë lojtarë për t'u ndjekur dhe beson se 28-vjeçari është një "lider" që drejton dhe ndërton ekipin.
"Një ekip i mirë mbulohet gjithmonë në fushë nga liderë, lojtarë skuadre, lojtarë shumëfunksionalë, specialistë, individualistë. Por ju duhen disa liderë në ekip, në fushë, të cilët duhet të udhëheqin skuadrën, që të ndërtojnë ekipin, që të kontrollojnë cilësinë e paraqitjes. Dhe ky njeri duhet të mbajë shiritin e kapitenit, prandaj ne e zgjodhëm Brunon sepse ai është një shembull i shkëlqyer, një inspirim për të tjerët në fushë," tha holandezi për faqen zyrtare të klubit.
"Ai gjithmonë dëshiron të jetë një futbollist më i mirë, duke punuar shumë për të dhënë paraqitjen e tij maksimale. Kështu që ai është pasqyrë për shumë lojtarë dhe është një lidhës i mirë shoqëror. Ai është gjithashtu shumë i mirë në të kuptuarit e lojës. Kështu që, për një trajner, është shumë mirë ta ketë atë ndërmjetës në fushë. Kështu që këto janë disa arsye, por ai nuk mund ta bëjë i vetëm. Ne kemi nevojë për më shumë ndihmë.”
Ten Hag trajtoi gjithashtu situatën e Maguires pasi mbrojtësit iu hoq kapiteni. Holandezi theksoi se ai mbetet "i rëndësishëm" për ekipin, por duhet "të luftojë për vendin e tij".
"Ne e respektojmë Harryn. Harry është shumë i rëndësishëm për këtë skuadër. Dhe, ju e dini, në rolin e tij si qendërmbrojtës, ne kemi katër qendërmbrojtës. Unë fola për qëndrueshmërinë dhe ne e dimë se nuk mund ta bëjmë këtë me 11 lojtarë dhe kështu jam i lumtur që kemi katër qendërmbrojtës shumë të mirë. Ne do të kemi nevojë për ta dhe ai duhet të luftojë për vendin e tij në formacion," tha për fund Ten Hag.
