Ten Hag: Kemi nevojë për përforcime të reja
Manchester United është veçuar me një fazë parapërgatitore të suksessshme, por për trajnerin e ri të saj, Ten Hag, ende ka hapësirë dhe nevojë për përforcime të reja.
"Djajtë e kuq" gjatë viteve të fundit shënimin e ndonjë mos-suksesi nuk e kanë të ndërlidhur me faktin që nuk kanë shpenzuar të holla në afrimin e lojtarëve të rinj. Këtë e kanë bërë. Madje,me raste bërë investime më të mëdha edhe sesa vetë Manchester City.
Fusha nuk ka treguar rezultatet e pritura në proporcion me shpenzimet e bëra. Erik ten Hag, si trajner i ri po mundohet që ta ngushtojë dallimin me dy ekipet që në vitet e fundit po mbizotërojnë në Angli, si Manchester City dhe Liverpool.
Për ta bërë një gjë të tillë, trajneri holandez kërkon disa përforcime të reja, ngase e sheh organikën e skuadrës së tij të pakompletuar ende.
Nevoja për përforcime të reja sipas Ten Hag
Disa mungesa për pasojë e lëndimeve dhe Cristiano Ronaldo që me shumë vështirësi po vijon të jetë pjesë e skuadrës, e kanë ç'orientuar në masë të madhe edhe tërë skuadrën para fillimit të sezonit të ri të Premierligës, që brenda pak orësh hap siparin me ndeshjen e parë në Selhurst Park mes Crystal Palace dhe Arsenal.
I gjendur në këtë pozitë, Ten Hag është treguar mjaft i sinqertë në konferencë për shtyp, në vigjilje të ndeshjes që Manchester United do ta luajë kundër Brighton në "Old Trafford".
"Jemi ende duke kërkuar lojtarë në afatin kalimtar. E kam thënë edhe më herët. Jam i lumtur me mesfushën. Kemi bërë paraqitje të mira në fazën parapërgatitore. Kemi një skuadër të mirë, por mund të përforcohemi akoma. Kemi nevojë për të pasur konkurueshmeri brenda skuadrës", tregoi ai.
Trajneri holandez e bëri të qartë që është i kënaqur me fillimin e Eriksen dhe Lisandro Martinez, por shpjegoi si kanë nevojë edhe për lojtarë të tjerë të mirë.
"Do të ketë shumë ndeshje në këtë sezon, që do të jetë shumë i gjatë. Kemi nevojë për lojtarë të mirë. Erikseh dhe Lisandro Martinez janë një fillim i mirë", ka përfunduar Ten Hag.
