Sterling e pranon se karriera e tij te Chelsea ka përfunduar, ylli anglez në kërkim të skuadrës së re
Raportohet se Raheem Sterling është duke kërkuar për skuadër të re, pasi e ka pranuar që karriera e tij te Chelsea tashmë ka përfunduar.
E ardhmja e Sterlingut në Chelsea u vu në dyshim kur ai u la jashtë skuadrës së Enzo Marescas për ndeshjen hapëse në Premierligë kundër Manchester Cityt, duke bërë që kampi i tij të kërkonte "qartësi" nga londinezët për situatën e tij. Sipas Standard, 29-vjeçari tani pranon që karriera e tij në Stamford Bridge ka përfunduar, pasi është përjashtuar gjithashtu nga skuadra për ndeshjen e parë të play-offit të Ligës së Konferencës të së enjtes kundër Servettes.
Raportimi shton se anësori do të dëgjojë propozimet nga klubet e tjera para afatit të transferimit të së premtes së ardhshme. Por zhvendosja e tij mund të jetë më e lehtë të thuhet sesa të bëhet; Sterling ka tre vjet të mbetur në kontratën e tij prej 300,000 funte në javë dhe, me familjen e tij të re të vendosur në perëndim të Londrës, nuk do të detyrohet të bëjë një lëvizje që nuk i përshtatet atij. Interesimi nga Arabia Saudite tashmë është refuzuar nga ish-ylli i Manchester Cityt.
Maresca e informoi Sterling në një bisedë pas stërvitjes të premten se Chelsea po i jep përparësi lojtarëve të tjerë në pozicionin e tij dhe se ai mund të largohet. Kjo pavarësisht se trajneri e pranoi publikisht se donte që anglezi të qëndronte.
Sterling tani për tani e gjen veten në harresë. Juventus dëshiron të nënshkruajë me ish-sulmuesin e Liverpoolit, por pagat e tij të majme po rezultojnë problematike. Anësori nuk është i vetmi lojtar i Chelseat, e ardhmja e të cilit duhet të zgjidhet përpara afatit të javës së ardhshme.
