Rexhbecaj: Ju kërkojmë falje, do të kthehemi më të fortë

Mesfushori Elvis Rexhbecaj thotë se ndihet krenar për debutimin në fanellën e Kosovës, por duhet të kthehen fuqishëm.

Kapiteni i Augsburgut debutoi në humbjen turpëruese ndaj Rumanisë, ndërsa në rrjetin social “Instagram” iu kërkoi falje tifozëve.

Ai shkroi se do të kthehen më të fortë dhe që duhet të punojnë shumë më shumë.

“Dje, për mua ishte një moment i veçantë, loja e parë me fanellën e Kosovës. Jam krenar që kam mundësinë të përfaqësoj vendin tim.

Rezultati nuk ishte ai që të gjithë e dëshironim, dhe për këtë ju kërkojmë falje.

Por jemi të vendosur të kthehemi më të fortë! Na presin sfida përpara. Me përkushtim, dedikim dhe punë do të arrijmë më të mirën.

Faleminderit për përkrahjen e dashurinë. Bashkë do të kthehemi tek fitoret. Forca Kosova!”, shkroi ai ndër të tjera.

Ndërkohë, Kosova është duke vazhduar me stërvitje ngase pas tre ditëve do të përballet me Qipron.