Reagon Arbnor Muja pas deklaratave të Giresses: Nuk kërkova të jem titullar, s’lejoj të më njëlloset emri
Sulmuesi i Royal Antweript, Arbnor Muja ka deklaruar se Alain Giresse ka gënjyer në konferencë për shtyp duke thënë se nuk kërkoi të ishte titullar në ndeshjet e qershorit.
Tekniku francez të premten tha se Muja kishte kërkuar të ishte titullar në të dy ndeshjet e qershorit, gjë të cilën ai nuk e pranoi prandaj edhe s’ka ardhur.
Mirëpo, tani ka reaguar edhe Muja që në “Facebook” shkroi se Giresse s’ka thënë të vërtetën dhe se ai thjesht e ka pyetur se ku qëndron në planet afatgjatë.
“Përshëndetje miq. Deri sot kam heshtur për çështjen e mosftesës sime nga selektori i Përfaqësueses së Kosovës, Alain Giresse. Por sot nuk do ta heshti”.
“Deklarata e selektorit Giresse që unë i kam kërkuar vendin titullar në ndeshjet e qershorit, është e pavërtetë. Me selektorin Giresse dhe ndihmësin e tij kam biseduar gjatë pjesëmarrjes time në ndeshjet e marsit, kërkesa ime ka qenë se ku qëndroj në planet e selektorit Giresse për ndeshjet e ardhshme dhe pse nuk jam paraqitur ndaj Izraelit dhe Andorrës dhe i kam treguar që mendoj se ka qenë e padrejtë mosprezenca ime në ndeshjet e marsit”.
“Secili trajner dhe stafi i tyre që ka punuar me mua e dinë të gjithë që unë një gjë të tillë nuk e kërkoj kurrë”.
“Emrin tim, selektori mund ta thërret, mund ta lërë në bankën rezervë, mund ta lërë edhe në tribuna por kurrë ta njollosë”.
“Suksese përfaqësueses së Kosovës”, shkroi Muja.
