Po kalon në formë të tmerrshme por Ten Hag thotë se asnjë mbrojtës nuk mund ta ndalë Antonyn
Trajneri i Manchester Unitedit, Erik Ten Hag, i ka dalë përsëri në mbrojtje Antonyt, pavarësisht se braziliani po kalon në një formë tmerrësisht të dobët, madje po raportohet se ai do të largohet nga Djajtë e Kuq.
Ten Hag, i cili nënshkroi Antonyn nga ish-klubi Ajax për 85 milionë funte (108 milion dollarë) në verën e vitit 2022, nuk i ka dhënë brazilianit një fillim që kur luajti ndaj skuadrës së kategorisë së katërt të Newport County në Kupën FA në fund të janarit. Antony nuk ka filluar një ndeshje në ligë që nga performanca e tij e tmerrshme kundër Nottingham Forest më 30 dhjetor, dhe është raportuar se United mund të zvogëlojë humbjet e tyre me largimin e anësorit në afatin kalimtar të verës.
“Unë e di nga e kaluara se ai është i pandalshëm, asnjë mbrojtës nuk mund ta ndalojë sepse ai është një nga më të shpejtët, kur të luajë atë lojë jam i sigurt se do të performojë, është elastik, është një karakter.” Ten Hag tha në një konferencë për shtyp të martën.
Antony ka shënuar vetëm një gol këtë sezon dhe ka vetëm një asistim, të dyja kundër Newport. Poshtërimi i tij më i madh, megjithatë, erdhi kur ai u la jashtë formacionit fillestar kundër Fulham - në ditëlindjen e tij të 24-të - në favor të 19-vjeçarit Omari Forson, i cili kurrë më parë nuk kishte luajtur për United. Antony u fut në lojë në minutën e 98-të të humbjes 2:1, e cila i dha një goditje të madhe ambicieve të skuadrës për të arritur top katërshen.
Vetëm javën e kaluar Ten Hag pranoi se Antony nuk e kishte treguar potencialin e tij kohët e fundit kur u pyet nëse braziliani mund të kishte një shans derisa Rasmus Hojlund të rikuperohej nga lëndimi.
United viziton Nottingham Forest në raundin e pestë të FA kupës të mërkurën. Kupa është shansi i fundit i Djajve të Kuq për të shpëtuar atë që ka qenë një sezon i mundimshëm gjatë gjithë kohës, me skuadrën që lufton për të arritur në top-katërshe pasi u rrëzua nga Liga e Kampionëve në fazën e grupeve.
