Pas dënimit me pikë, Monza përkujdeset t’ia thellojë krizën Juventusit

Juventusi nuk ka parë dritë me sy që nga dënimi me -15 pikë nga gjyqësori sportiv italian. Për thellimin e krizës u përkujdes skuadra e inkuadruar këtë sezon në Serie A, Monza, e cila e mposhti me rezultat 2:0 në Allianz Stadium.

Barazimi një javë më parë me Atalantën ishte vetëm fillimi i një serie të keqe, që siç duket situata me dënimet ka ndikuar shumë edhe në psikologjinë e lojtarëve.

Futboll / Juventus nuk sheh dritë me sy, barazon në shtëpi kundër Atalantas

Sa i përket ndeshjes, zonja e vjetër në pjesën e parë nuk tregoi pothuajse asgjë, ndërsa Monza arriti të shënonte tre herë, por njëri nga golat u anulua nga VAR-i.

Zhvillohej minuta e 18-të, kur Patrick Ciurria shënoi golin e parë të ndeshjes, pas asistimit të Pepin për 1:0.

Pak minuta para se të përfundonte pjesa e parë u shënua edhe goli i dytë. Për dyfishimin e epërsisë u përkujdes Dany Mota në minutën e 39-të, i asistuar nga Carlos Augusto.

Me rezultatin 2:0 përfunduan 45 minutat e para të takimit.

Në pjesën e dytë Juventusi u tregua më e rrezikshme, duke krijuar disa shanse të mira shënimi, por portieri i Monzës, Di Gregorio ishte në ditën e tij, duke ia mohuar disa herë golin yjeve të zonjës së vjetër.

Si rrjedhojë gola deri në fund të takimit më nuk pati dhe ndeshja përfundoi me rezultat 2:0 me golat e shënuar në pjesën e parë.

Juventusi tani zbret edhe për një pozitë më poshtë, duke liruar vendin e 11-të pikërisht për Monzën, teksa vetë ata pozicionohen në vendin e 12-të me 23 pikë në 20 ndeshje (-15 pikë për shkak të dënimit).