Paraqitja e jashtëzakonshme e portierit Livakovic që ia fitoi lojën kundër Brazilit – statistikat

Portieri i Dinamo Zagrebit, Dominik Livakovic, është njeriu i momentit te Kombëtarja e Kroacisë, pasi që shkëlqeu edhe në çerekfinale, për ta ndihmuar skuadrën në eliminimin e Brazilit dhe kalimin në gjysmëfinale.

Kjo natë për 27-vjeçarin do të jetë e paharrueshme, pasi jo vetëm që ia solli fitoren e radhës Kroacisë, por theu edhe rekordin për më së shumti pritje gjatë një ndeshje Botërori.

Përgjatë 120 minutave lojë, ai priti plot 11 goditje të brazilianëve dhe në vetëm një rast u mposht, nëpërmjet magjisë së Neymarit në fund të pjesës së parë të vazhdimeve.

Përveç pritjeve gjatë tërë ndeshjes, vendimtar ishte edhe në penallti, duke pritur shumë bukur gjuajtjen e parë të brazilianëve, saktësisht Rodrygos, për t’i dhënë kombëtares së tij një forcë më të madhe, teksa ishte i pafat në penalltinë e radhës, kur lexoi anën por Casemiro goditi fuqishëm për ta mposhtur.

Livakovic ishte vendimtar edhe në ndeshjen e 1/8-ës së finales kundër Japonisë, ku gjatë ekzekutimit të penalltive, priti tri goditje të aziatikëve.

Në total, Livakovic çoi në katër numrin e penalltive të pritura në këtë Botëror, duke barazuar bashkëkombësin, Danijel Subasic dhe argjentinasin legjendar, Sergio Goycochea, për më së shumti penallti të pritura në një Kupë të Botës.

Padyshim portieri i Dinamo Zagrebit është portieri më i mirë i këtij turneu deri më tani, dhe në rast të një finaleje të arritur, mund të jetë edhe futbollisti më i mirë i turneut, ku do të ishte vetëm portieri i dytë që fiton një çmim të tillë, pas Oliver Kahn në Botërorin e 2002-ës.