Pamje: Diaz i jep fund karrierës së bujshme duke e mposhtur Fergusonin

Nate Diaz e ka mposhtur Tony Fergusonin duke e detyruar ta dorëzojë luftën, në atë që ishte meçi i tij i fundit në karrierën e bujshme 15-vjeçare në UFC.

Diaz, 37 vjeç, e mbërtheu Fergusonin për fyti duke e shtrënguar fort derisa ai u dorëzua në meçin UFC 279 të shtunën mbrëma në Las Vegas.

Ferguson e zëvendësoi Khamzat Chimaevin të premten, pasi suedezi kishte dështuar ta arrijë limitin e peshës gjysmë të mesme për t’u përballur me Diazin.

Diaz, i dashur për tifozët për shkak të karrierës së gjatë dhe personalitetit prej një rebeli, i fitoi 16 prej 27 luftërave që prej se iu bashkua UFC-së në moshën 22-vjeçare.

Lufta në T-Mobile Arena ishte e fundit në kontratën e Diazit më UFC-në.

Ferguson, 38 vjeç, ka një karrierë të gjatë 11-vjeçar në UFC, duke i fituar 15 prej 20 luftërave, por para përballjes me Diazin i kishte humbur katër luftëra radhazi.

Diaz ishte më i mirë gjatë gjithë luftës, veçanërisht gjatë shkëmbimeve me grushte, derisa përqendrimi i Fergusonit ishte ta sulmonte këmbëve bashkatdhetarin e vet.

Pas goditjeve të vazhdueshme që i shkaktuan dëme Fergusonit, Diazi më në fund arriti ta detyrojë atë të dorëzohet në rundin e katërt, duke ia zënë frymën.

Pas triumfit, Diazi la të kuptohej se do të zhvendoset në sporte të tjera luftarake.

“Ka qenë një marrëdhënie dashuri dhe urrejtje mes meje dhe UFC-së”, tha Diaz.

“Sot ia dola. E dua UFC-në. Ndiej se e kam pasur karrierën më të gjatë në UFC dhe më të suksesshmen”.

Ai shtoi: “Dua të dal nga UFC-ja dhe t’iu tregoj të gjithë luftëtarëve se si mbizotërohet një sport tjetër. Boks, kikboks, jiu jitsu. Unë jam më i miri këtu dhe po vij për ju.”