“Natë tmerri!” Mediat spanjolle i gozhdojnë Barcelonën dhe Atletico Madridin
Shtypi spanjoll i ka gozhduar Barcelonën dhe Atletico Madridin për dështimin e tyre të hershëm në Ligën e Kampionëve, pasi të dy gjigantët e La Ligës u eliminuan qysh në fazën grupore të këtij sezoni.
Barcelona e mësoi fatin e vet ende pa e goditur topin të mërkurën, pasi Interi e dërrmoi 4:0 Viktoria Plzenin më herët gjatë ditës në ndeshjen tjetër të grupit, dhe ajo u mposht lehtësisht 3:0 nga Bayern Munich midis Camp Nou.
Ndërkohë, Atletico Madridi e kishte fatin në duart e veta për ta kaluar Grupin B, por u ndalë me një barazim 2:2 nga Bayer Leverkusen, sepse Yannick Carrasco e humbi penalltinë në kohën shtesë dhe e bllokoi goditjen e bashkëlojtarit të vet nga topi i kthyer.
Sikur Carrasco të shënonte në minutën e 98-të, Atletico do të mundë ta siguronte kalimin në fazën e eliminimit direkt në ndeshjen e fundit në grup.
Me Sevillën të eliminuar po ashtu, Real Madridi – kampioni në fuqi evropian – është klubi i vetëm spanjoll i mbetur në Ligën e Kampionëve këtë sezon.
Mediat spanjolle nuk i kanë kursyer Barcelonën dhe Atleticon për dështimin e tyre të hershëm në garën më prestigjioze evropiane për klube.
Gazeta spanjolle AS e përshkroi si “Natë tmerri” në ballinën e vet kryesore për ditën e enjte dështimin e Barçës dhe Atleticos.
E përditshmja Marca u përqendrua kryesisht në zhgënjimin e Atletico duke e cilësuar si “mizor” eliminimin e tij duke qenë se i ishte dhënë një mundësi e jashtëzakonshme për të fituar me penalltinë në çastet e fundit.
As gazeta Sport nuk ngurroi t’i kritikojë Barcelonën dhe Atleticon, duke e përshkruar si “Dështim të përkryer” eliminimin e tyre.
Ky është viti i dytë radhazi që Barcelona dështon ta kalojë grupin në Ligën e Kampionëve, pasi u mposht lehtësisht nga Bayerni në Camp Nou.
