Maroku në gjysmëfinale të Lojërave Olimpike, shënon fitore bindëse ndaj Shteteve të Bashkuara të Amerikës - NACIONALE
NACIONALE

Maroku në gjysmëfinale të Lojërave Olimpike, shënon fitore bindëse ndaj Shteteve të Bashkuara të Amerikës

2 vjet më parë

nga NACIONALE

Kombëtarja e Marokut ka shënuar fitore të thellë 4:0 ndaj Shteteve të Bashkuara të Amerikës, kështu për t'u bërë skuadra e parë që arrin në gjysmëfinale të Lojërave Olimpike Paris 2024.

Maroku e kaloi grupin B si lidere me gjashtë pikë, aq sa kishte edhe Argjentina e vendit të dytë, e në anën tjetër ShBA-të erdhën nga vendi i dytë i grupit A, ku Franca ishte lidere.

Në takimin që u zhvillua në Parkun e Princave në stadiumin e PSG-së, Maroku e dominoi tërësisht takimin, duke pasur shumë raste shënimi, teksa e pati kontrollin e topit përgjatë 90 minutave.

Goli i parë i takimit erdhi në minutën e 29-të, kur Soufiane Rahimi, shënoi nga penalltia për 1:0, rezultat me të cilin u mbyll pjesa e parë.

18 minuta pasi filloi pjesa e dytë, Maroku dyfishoi epërsinë me anë të një aksioni shembull. Pas një kundërsulmi të shpejtë, Ezzalzouli asistoi bukur në zonë, ndërsa Akhomach shënoi lehtësisht për 2:0.

Goli i tretë erdhi sërish nga një kundërsulm, por kësaj radhe në solo-aksion ishte Achraf Hakimi, që u nis i vetëm dhe e përfundoi me gol për 3:0 në minutën e 70-të.

Për rezultatin përfundimtar 4:0 shënoi Maouhoub në minutat shtesë nga penalltia.

Në gjysmëfinale, Maroku do të përballet me fituesin nga përballja tjetër çerekfinale mes Japonisë e Spanjës.

Tjera:

Lajme të ngjashme