Manchester Unitedi dënohet me 63 mijë euro pas përleshjeve në përballjen me Crystal Palacen
Ashtu si Crystal Palace edhe Manchester Unitedi është dënuar me 63 mijë euro gjobë, për përleshjen në përballjen mes këtyre dy skuadrave në Premierligë, me Casemiron që kapi për fyti Will Hughes.
Mesfushori brazilian u përjashtua me karton të kuq dhe u dënua për tre ndeshje, pasi u përfshi në një incident me Hughes në fitoren e djajve të kuq 2:1 ndaj Crystalit më 4 shkurt.
Federata e Futbollit (FA) tani ka konfirmuar që të dy klubet janë gjobitur për "dështim për të siguruar që lojtarët e tyre të sillen në mënyrë të rregullt dhe të përmbahen nga sjelljet provokuese".
Regulation and Discipline update on @ManUtd and @CPFC: pic.twitter.com/8TEEF8AKOB
— FA Spokesperson (@FAspokesperson) February 28, 2023
Incidenti ndodhi në minutën e 67-të të lojës, në të cilën fazë United ishte në avantazh 2:0 dhe po shkonte drejt fitores së radhës. Palace ngushtoi rezultatin pasi skuadra e Erik ten Hag ishte me 10 lojtarë në fushë, të cilët më pas morën tre pikët e plota.
Deklarata e FA-së zbulon se United e pranoi akuzën, ndërsa Palace mohoi pjesëmarrjen e tyre në çdo konfrontim dhe më pas u shpall fajtor nga një Komisioni i Pavarur Rregullator.
Ndeshja e radhës e United është një përballje në shtëpi kundër West Ham në raundin e pestë të FA kupës, ndërsa ndeshja e radhës e Palaces është në udhëtim te Aston Villa në ligë të shtunën.
