Manchester City triumfon me rezultat komod ndaj Copenhagen, Real Madridi me fitore të vështirë ndaj Leipzig

Kanë përfunduar dy ndeshjet e para të fazës së 1/8 së finales në Ligë të Kampionëve, aty ku Manchester City e ka mposhtur Copenhagen me rezultat 3:1, ndërsa në anën tjetër Real Madridi ka fituar 1:0 ndaj Leipzig, për të lënë që gjithçka të vendoset në ndeshjet e kthimit.

Manchester City e dominoi totalisht skuadrën daneze, por që rastet e shumta nuk u konkretizuan. Në ndeshjen tjetër më e rrezikshme u tregua Leipzig, por heroi i Real Madridit ishte portieri Lunin, që pati paraqitjen ndoshta më të mirë në karrierën e tij.

Copenhagen - Manchester City

Skuadra e Pep Guardiolës e dominoi takimin totalisht, si në posedim ashtu edhe në krijim të rasteve, por rezultati përfundimtar la për të dëshiruar.

Ishte një gol i hershëm i minutës së 10-të që pa Qytetarët në epërsi, me golin e bukur të shënuar nga Kevin De Bruyne.

Mattson barazoi gjithçka në minutën e 34-të, kur Ederson bëri një gabim të tmerrshëm.

Për ta çuar Manchester Cityn në pushim me epërsi, u kujdes Bernardo Silva, që shënoi gol në minutat shtesë të pjesës së parë, për rezultatin 2:1.

Përkundër shumë rasteve në pjesë të dytë, Manchester City shënoi vetëm edhe një gol, atë të minutave shtesë në pjesë të dytë, të realizuar nga Phil Foden, që u asistua nga De Bruyne për rezultatin përfundimtar 3:1.

Leipzig - Real Madrid

Në anën tjetër në Gjermani u zhvillua lojë shumë interesante, tejet e barabartë sa i përket posedimit dhe rasteve të krijuara, por goditjet në drejtim të portës ishin në anën e Leipzig që edhe përkundër kësaj, pësuan humbje për shkak të një paraqitje të jashtëzakonshme të portierit ukrainas të Real Madridit.

Goli i vetëm i ndeshjes u shënua në pjesën e dytë, kur në minutën e 49-të Diaz mori një top nga Carvajal, për të bërë kalime fantastike e për të shënuar gol të jashtëzakonshëm për 1:0.

Deri në fund gola më nuk pati, për arsyen e vetme që u cek më lart, pra fajtori ishte Lunin me nëntë pritjet e tij.

Real Madrid dhe Manchester City përkundër fitoreve do të zhvillojnë ndeshjet e kthimit më 6 mars, për të konfirmuar skuadrat që kalojnë në çerekfinale.