Maldini: Po e shijoj jetën e tretë si drejtor te Milani

Legjenda e Milanit, Paolo Maldini, po shijon jetën e tretë siç thotë ai në Milan në rolin e drejtorit, pas rolit si lojtar dhe periudhën pas pensionimit.

Ai e kaloi të gjithë karrierën e tij si lojtar duke veshur fanellën e kuqezinjve, nga akademia e tyre e të rinjve e deri te kapiteni duke ngritur Ligën e Kampionëve, dhe po ndiqte gjurmët e babait të tij Cesare, ashtu si djali Daniel që është duke i ndjekur pas tij.

Askush nuk e mishëron Milanin më shumë se Maldini dhe ai u rikthye në 2018 si drejtor për zhvillim, i promovuar në drejtor teknik një vit më vonë.

“Kur isha duke luajtur, ne nuk kishim media sociale, kishte më pak fotografë përreth, jo aq shumë kuriozitet për lojtarët e futbollit, kështu që ne kishim lirinë për të jetuar një jetë pothuajse normale,” tha Maldini për podcast M20.

“Në moshën 20-vjeçare, ti dëshiron të dalësh dhe të kesh akoma energji për ta bërë një jetë nate, por unë kurrë nuk kam pirë, nuk kam pirë duhan apo drogë.

Personi më i shqetësuar ishte babai im Cesare, pasi mentaliteti i tij ishte i viteve 1960.

Me kalimin e kohës mësova se çfarë mund të bënte dhe çfarë nuk mund të bënte trupi im, edhe duke bërë gabime. Unë gjithmonë u them fëmijëve të mi, siç duhet çdo baba me fëmijët e tij: provoni, bëni një gabim, por mësoni prej tij.”

Ai kishte figura nga të cilët mësonte, fillimisht nga babai i tij e pastaj brenda skuadrës së Milanit, nga kapiteni i mëparshëm, Franco Baresi.

“Edhe në stërvitje, Baresi më mirë do të vdiste sesa të pranonte një gol. Ai tha shumë pak, por veprimet e tij folën për të.”

Pasi Maldini vari këpucët, iu desh shumë kohë që të gjente hapin tjetër të karrierës dhe në të vërtetë të jetës së tij, i cili përfshinte atë si bashkëpronar i skuadrës amerikane të futbollit, Inter Miami FC.

“Kur dola në pension në moshën 41-vjeçare, më mungonte adrenalina. Tre muajt e parë, duke parë derbin dhe më pas Barcelonën... Por më pas e kalova dhe gjeta një jetë të dytë për veten time, duke bërë gjërat banale që nuk munda kurrë më parë, si thjesht takimi me miqtë për kafe.

Shkova në Shtetet e Bashkuara dhe doja të hapja një hotel, por në vend të kësaj ndryshova projekt. E shijova kohën me gruan, fëmijët dhe miqtë e mi që nuk kisha mundur më parë.

Por tani, ky rol si drejtor teknik është një jetë e tretë, mes zyrës dhe terrenit të stërvitjes në Milanello. Unë ulem në stol, shikoj stërvitjen, flas me trajnerin dhe lojtarët”, përfundoi legjenda e Milanit dhe një nga mbrojtësit më të mirë në histori të futbollit.