“Loja e parë, fitorja e parë” – Reagimi i Ronaldos pas debutimit për Al Nassr
Cristiano Ronaldo është shumë i lumtur që Al Nassr arriti t’i fitojë tri pikë në ndeshjen e tij debutuese në kampionatin e Arabisë Saudite dhe shprehu mirënjohje ndaj bashkëlojtarëve dhe tifozëve.
Sulmuesi portugez debutoi për Al Nassr të dielën madje si kapiten e skuadrës, në fitoren 1:0 kundër Al-Ettifaq.
Talisca e shënoi golin e fitores për Al Nassr dhe pavarësisht se nuk arriti të lërë mbresa në debutimin e tij, Ronaldo ishte i kënaqur me rezultatin e ndeshjes.
Pas ndeshjes, 38-vjeçari shkroi në Twitter: “Ndeshja e parë, fitorja e parë. Ju lumtë, djem! Faleminderit të gjithë tifozëve për përkrahjen e jashtëzakonshme”.
First game, first win - well done guys 🙌🏻 Thanks to all the fans for incredible support. 💙💛 pic.twitter.com/vmgwE8TgVo
— Cristiano Ronaldo (@Cristiano) January 22, 2023
Kjo ishte paraqitja e parë e Ronaldos për klubin saudit në një ndeshje garuese, pasi ai kishte debutuar fillimisht në një ndeshje miqësore për ekipin e kombinuar mes Al Nassr dhe Al Hilal kundër Paris Saint-Germainit javën e kaluar.
Në atë ndeshje, Ronaldo shënoi dy gola, por skuadra e tij humbi 5:4 kundër gjigantit francez.
Ronaldo pritet të luajë titullar për Al Nassr në ndeshjen e radhës kundër Al Ittihad, një gjysmëfinale e Superkupës së Arabisë Saudite të enjten.
Ronaldo iu bashkua Al Nassrit në dhjetor si lojtar i lirë, pasi u largua nga Manchester Unitedi duke e shkëputur kontratën me pëlqim dypalësh.
Ai nënshkroi marrëveshje deri në vitin 2025 me klubin saudit, e cila e bën atë futbollistin më të paguar në botë me 200 milionë euro në vit.
