Leicester City e fiton rastin, shmangë zbritjen e pikëve në Premierligë

Leicester City ka fituar rastin të cilin e kishte apeluar, për shkak të zbritjeve të pikëve për shkelje të rregullave për Përfitueshmëri dhe Qëndrueshmëri në Premierligë, siç ka njoftuar klubi.

Leicester, i cili është rikthyer në elitën angleze pasi fitoi Championshipin sezonin e kaluar, apeloi mbi bazën se një vendim i komisionit të pavarur për rastin nuk kishte juridiksion, i cili u mbështet nga një bord i pavarur apeli.

Vendimi erdhi me arsyetimin se periudha kontabël e Leicester përfundoi më 30 qershor 2023, kur klubi nuk ishte më anëtar i Premierligës pas rënies së tyre në nivelin e dytë.

Klubet e Premierligës lejohen të humbasin vetëm deri në 105 milionë funte (137.56 milionë dollarë) gjatë një periudhe tre-sezonale sipas rregullave të PSR-së, dhe si Everton ashtu edhe Nottingham Forest iu dhanë zbritje pikësh sezonin e kaluar.

Bordi i apelit arriti në përfundimin se momenti në të cilin Leicester supozohet se ka tejkaluar pragun e humbjes nuk mund të kishte ardhur përpara datës 30 qershor dhe çdo humbje mund, pjesërisht, të rezultojë nga aktivitetet e tyre tregtare pasi ata pushuan së qeni një klub i Premierligës.

“Leicester City mirëpret vendimin gjithëpërfshirës të Bordit të Apelimit, i cili mbështet qëndrimin tonë të deklaruar vazhdimisht se çdo veprim kundër Klubit duhet të ndiqet në përputhje me rregullat e zbatueshme,” tha Foxes në një deklaratë.

Leicester u referua për herë të parë nga Premierligë te komisioni i pavarur në mars, dhe komisioni hodhi poshtë sfidën e parë të klubit ndaj juridiksionit të tij për të dëgjuar çështjen.

Premierligë tha se ata ishin të befasuar dhe të zhgënjyer nga vendimi i shpallur të martën.

“Vendimi i Bordit të Apelimit do të thotë në mënyrë efektive që, pavarësisht se klubi është anëtar i Ligës nga sezonet 2019/20 deri në 2022/23, Liga nuk mund të ndërmarrë veprime kundër klubit për tejkalimin e pragut përkatës të PSR në lidhje me periudhat kontabël përkatëse,“ thuhet në një deklaratë të Premierligës.

Leicester u përgjigj në deklaratën e tyre për shtyp, duke thënë se ata donin të shmangnin çdo keqkuptim që mund të lindte pas deklaratës së Premierligës në përgjigje të vendimit të apelit.

“Leicester City dëshiron të theksojë konstatimin e Panelit të Apelit se, kur merret parasysh formulimi që përdoret në të vërtetë në rregullat e Premierligës, klubi nuk ka shkelur PSR-të e Premierligës për periudhën e vlerësimit që përfundon më 30 qershor 2023”, thuhet në njoftim.