Kosova mbyll pjesën e parë me epërsi ndaj Sllovenisë

Pas 45 minutave të para, Kosova shkon në pushim me epërsinë 0–1 ndaj Sllovenisë falë golit të hershëm të Fisnik Asllanit në minutën e 6-të, pas një pasimi perfekt nga Mërgim Vojvoda.

Ndeshja nisi me intensitet të lartë, me Kosovën që mori në dorë kontrollin e topit në minutat e para dhe gjeti golin pas një aksioni të shpejtë dhe të pastër. Asllani u gjend sërish në qendër të vëmendjes rreth minutës së 20-të kur u shtri në fushë pas një goditjeje, por pas trajtimit mjekësor ai u rikthye në lojë.

Pjesa e parë u karakterizua nga shumë duele të ashpra. Gjyqtari Clement Turpin ndërhyri shpesh, duke ndalur lojën pas faulleve të rënda nga të dyja skuadrat. Dellova, Muslija dhe Muriqi u ndëshkuan me faulle të panevojshme në tentativë për të fituar topin, ndërsa nga ana tjetër Drkusic, Horvat dhe Karnicnik u shfaqën agresivë në ndërhyrjet e tyre.

Sllovenia pati dy raste serioze. Në minutën e 12-të, Vipotnik rrezikoi me një goditje me kokë pranë shtyllës, ndërsa në minutën e 30-të, Horvat testoi portën me një goditje të rrezikshme, por Amir Saipi reagoi në kohë duke e devijuar në rivënie nga këndi.

Kosova nga ana tjetër pati një mundësi të mirë në minutën e 26-të, kur Muslija u gjet në zonë, por gjuajtja e tij u ndal nga mbrojtja vendase.