Kishte grushtuar gjyqtarin në Superligën turke, burgoset ish-presidenti i Ankaragucu
Gjykata e Turqisë e ka dënuar ish-presidentin e klubit Ankaragucu të Superligës (tashmë që luan në Ligën e Parë) me tre vjet burg, pasi ky i fundit e kishte sulmuar gjyqtarin në fushë gjatë një ndeshje të elitës së futbollit turk.
Ish-presidenti i Ankaragucu, Faruk Koca goditi me grusht gjyqtarin Hamil Umut Meler në fytyrë pas barazimit 1:1 me Caykur Rizespor në Super Lig në dhjetor 2023. Tani, sipas Associated Press, një gjykatë në Ankara e dënoi Koca për "goditje të qëllimshme të një zyrtar publik” dhe e dënoi me tre vjet e shtatë muaj burg.
Incidenti shkaktoi zemërim në mbarë botën, me Federatën Turke të Futbollit që pezulloi të gjitha ndeshjet e ligës për disa javë. Koca dha dorëheqjen si president i klubit menjëherë pas incidentit, i cili e la gjyqtarin me një frakturë të vogël pranë syrit. Gjykata deklaroi se ai u dënua gjithashtu për kërcënimin e zyrtarit dhe për shkeljen e ligjeve që synonin parandalimin e dhunës në sport - por ato dënime u pezulluan.
Ankaragucu u gjobit me dy milionë lira turke (45,000 £) dhe u detyrua të luante pesë ndeshje pa tifozë si rezultat i përleshjes, që erdhi menjëherë pasi Rizespor shënoi golin e barazimit në minutën e fundit. Ata u rrëzuan nga Superliga turke më vonë atë sezon.
Gjykata shtoi se tre persona të tjerë që ishin gjithashtu në gjyq për sulmin ndaj gjyqtarit u dënuan me burgim nga një deri në pesë vjet. Raportimet sugjerojnë se Koca ka ndërmend të apelojë vendimin.
