Inter Miamit s’po i kryen punë as Messi me shokë, eliminohet nga Kupa e Kampionit

Inter Miami nuk po di për këndellje pavarësisht që në skuadër ka emra si Lionel Messi, Luis Suarez, Sergio Busquets e Jordi Alba, pasi janë eliminuar nga Kupa e Kampionit.

Skuadra amerikane pësoi humbje me rezultat 3:1 në udhëtim te klubi meksikan Monterrey.

Vazquez i kaloi vendasit në epërsi me një gol të bukur (31’), ndërsa fitoren e vulosën pas golave të Berterame (58’) dhe Gallardos (64’).

Inter Miami faktikisht mbeti edhe me një lojtar më pak, me Jordi Alban që u ndëshkua dy herë kartonë të verdhë.

Ndërkohë, e tëra që arriti të bëjë Inter Miami ishte goli i nderit – i shënuar nga Gomez pas një asistimi të Leo Messit.

Kësisoj, merr fund një tjetër kompeticion për yllin argjentinas, me klubin meksikan që e ka ngacmuar pas fitores duke shkruar në rrjetin social “Twitter” “Siuuuu”, që është festa e rivalit Cristiano Ronaldo.