Haller kthehet në stërvitje pasi kaloi tumorin në testikuj
Sulmuesi i Borussia Dortmundit, Sebastian Haller, është kthyer në stërvitje, tre muaj pasi kaloi me sukses operimin për tumorin në testikuj.
Haller, i cili u transferua në skuadrën gjermane gjatë afatit kalimtar veror nga Ajaxi, pasi kaloi një sezon të jashtëzakonshëm, nuk arriti të paraqitet në asnjë ndeshje garuese në Bundesligë.
Ai u diagnostikua me tumor në testikuj dhe si rrjedhojë u përball me kimioterapinë dhe një operim që i morën tre muaj, por që në fund doli me sukses.
Të hënën, trajneri i Ajaxit, Alfred Schreuder, zbuloi se Haller kishte kërkuar të stërvitej me ish-klubin e tij dhe po vazhdon rehabilitimin e tij me skuadrën e Eredivisies.
"Ai na pyeti nëse mund të vinte dhe të stërvitej sepse po rehabilitohej këtu," tha Schreuder.
"Atëherë është sigurisht e mrekullueshme që ai mund të jetë këtu për një kohë. Ai ishte në gjendje të stërvitej në një fushë tjetër për të ndihmuar në rikuperimin e tij", nënvizoi trajneri holandez.
Haller shënoi 47 gola në 66 ndeshje për Ajax pasi u bashkua nga West Ham United vitin e kaluar dhe shijoi një sezon të mirë 2021-22 në Ligën e Kampionëve me 11 gola në tetë ndeshje të zhvilluara.
Qendërsulmuesi ka një karrierë të begatshme, duke u paraqitur në shumë skuadra evropiane, ku më parë ka zhvilluar ndeshje edhe në kampionatin gjerman me skuadrën Eintracht Frankfurt.
Në karrierën e tij ai ka luajtur për: Utrecht, Auxerre, Frankfurt, West Ham, Ajax dhe tani në Borussia Dortmund.
Ai gjithashtu ka bërë 15 paraqitje për Bregun e Fildishtë , pasi ka përfaqësuar më parë Francën në nivel të gjeneratave të reja.
28-vjeçari tani pritet që ngadalë të marrë formën e dikurshme dhe t’i kthehet skuadrës që ja mjaft nevojë për të në garën për titullin kampion në Gjermani.
