Guardiola: Haaland në të njëjtin nivel me Messin dhe Ronaldon
Trajneri i Manchester Cityt, Pep Guardiola, ka thënë se ylli i skuadrës së tij, Erling Haaland, është në të njëjtin nivel me Lionel Messin dhe Cristiano Ronaldon, pas paraqitjes së sotme me dy gola të shënuar, njëri nga të cilët ishte i jashtëzakonshëm.
Haaland shënoi dy herë në fitoren e ‘Qytetarëve’ ndaj Southamptonit me rezultat 4:1 në stadiumin St Mary's të shtunën, duke e çuar numrin e golave të tij në Premierligë në 30 në vetëm 27 paraqitje. Guardiola e vlerësoi sulmuesin norvegjez që ndryshoi rrjedhën e takimit në ndeshjen e sotme dhe e krahasoi atë me sulmuesit legjendar Messi dhe Ronaldo.
.jpg?format=jpg)
"Goli i dytë ishte i mahnitshëm. Nuk është e lehtë të marrësh topin në qiell dhe ta vendosësh në bar," tha ai për Match of the Day. "Talenti i tij është vërtet shumë i mirë. Ne kemi nevojë për të. Pjesa e parë nuk e tregoi nivelin tonë më të mirë, por ai ndryshoi lojën. Si golashënuesi më i mirë, ne jetuam dy dekada të pabesueshme me Cristiano Ronaldon dhe Lionel Messin, por ai është në atë nivel. Ai shënon shumë gola. Jam shumë i lumtur me 65 minutat e tij të para pas lëndimit dhe ai na ndihmoi përsëri”.
Haaland ka qenë sensacional që kur u bashkua me klubin e Premierligës nga Borussia Dortmund verën e kaluar. 22-vjeçari ka qenë jetik në Ligën e Kampionëve edhe për skuadrën angleze, duke shënuar 10 herë në vetëm gjashtë paraqitje në këtë garë.
Haaland do të përpiqet të ruajë formën e tij të mrekullueshme kur skuadra e tij të përballet me Bayern Munich në Ligën e Kampionëve në mesjavë, në ndeshjen e parë çerekfinale.
