Granit Xhaka i jep këshillë Havertzit pasi po vuan në rolin e mesfushorit
Mesfushori Granit Xhaka e ka këshilluar Kai Havertzin të qëndrojë i qetë derisa të adaptohet në rolin e ri, ku beson se gjermani do t’i bëjë kritikët “t’i hajnë fjalët”.
Havertz kaloi te Arsenali këtë verë duke e zëvendësuar Xhakën në një marrëveshje 65 milionë funtesh, me këtë të fundit që iu bashkua Leverkusenit.
Havertz nuk e nisi mirë duke bërë paraqitje të zbehta, mirëpo javët e fundit ka nisur të përshtatet në stilin e lojës së Artetas.
Xhaka, i cili ka pas një situatë të ngjashme e ka këshilluar lojtarin që të jetë i duruar derisa të gjejë veten në këtë rol të ri.
“E di se si është për Kain, njerëzit nga jashtë janë pak nervoz dhe tifozët mund të zemërohen”.
“Ai thjesht duhet të qëndrojë i qetë. Është pozitë e re për të dhe duhet pak kohë për të kuptuar filozofinë e plotë të lojës së Mikel”.
“Por ai po bëhet më mirë gjithnjë dhe besimi i tij po rikthehet tani”.
“Të gjithë e dinë potencialin e tij por ta kesh besimin e klubit, trajnerit dhe bashkëlojtarëve është gjithçka. Të duhet gjithmonë ajo mbështetje”.
Ndërkohë, Xhaka gjithashtu zbuloi se do të jetë i pranishëm në ndeshjen ndaj West Hamit më 28 dhjetor: “Do të jetë shansi ynë për t’iu thënë lamtumirë lojtarëve, stafit dhe mbështetësve në mënyrën e duhur”.
