Gjyqtari i finales e godet Francën: Edhe te goli i Mbappes lojtarët tuaj u futën në fushë
Gjyqtari kryesor i finales së Kupës së Botës në Katar, Szymon Marciniak, u akuzua nga mediat franceze se pranoi golin e Lionel Messit derisa ishte i paligjshëm, pasi në fushë ishin më shumë se 11 lojtarë argjentinas, ndërsa ai u kundërpërgjigj duke treguar një foto nga goli i Kylian Mbappes, ku shihet se situata është e ngjashme.
Marciniak, i cili u bë gjyqtari i parë polak që gjykon një finale Botërori, pati një paraqitje për lëvdata dhe mori ato nga shumë figura të njohura që gjykojnë dhe kanë gjykuar ndeshje më herët.
Ishte e përditshmja L’Equipe që akuzoi gjyqtarin për pranimin e golit të tretë të Argjentinës që u shënua në pjesën e dytë të vazhdimeve nga Messi, e ku futbollistët e bankës rezervë u panë në fushë pa përfunduar topi në rrjetë.
Por FIFA doli me sqarim se lojtarët që nuk janë në lojë e që nuk ndikojnë drejtpërdrejt në gol, atëherë goli është i rregullt.
Ndërsa tani Marciniak kur u ngacmua sërish për këtë rast, u kundërpërgjigj vetë në mënyrë të përkryer gjatë një konference për shtyp, duke shoqëruar pretendimet e tij edhe me foto.
“Francezët nuk e përmendën këtë foto, ku mund të shihni se si janë shtatë francezë në fushë kur Mbappe shënon një gol.”
Szymon Marciniak, the referee for the World Cup Final, has responded to @lequipe’s criticism that Lionel Messi’s second goal shouldn’t have counted:
— Zach Lowy (@ZachLowy) December 23, 2022
"The French didn't mention this photo, where you can see how there are seven Frenchmen on the pitch when Mbappé scores a goal.” pic.twitter.com/MW6y73iiLN
Ashtu si në golin e Messit, edhe në golin e Mbappes, u panë bashkëlojtarët e tij nga banka rezervë në fushë.
Rregullat e lojës sugjerojnë se të dy golat duhet të ishin anuluar.
Paragrafi 9 i Ligjit të FIFA-s për Futbollin thotë: Nëse, pas shënimit të një gol, gjyqtari e kupton se një person shtesë ishte në fushën e lojës kur goli u shënua: gjyqtari duhet patjetër ta shfuqizojë golin nëse personi shtesë ishte: Lojtar, zëvendësues, lojtari i zëvendësuar, lojtari i përjashtuar nga loja apo zyrtar ekipor i ekipit që e ka shënuar golin.
Megjithatë, Bordi Ndërkombëtar i Futbollit (IFAB), i cili i bën rregullat e futbollit për FIFA-n, ka thënë se ky rregull do të vlente vetëm nëse lojtarët e futur në fushën e lojës do ta kishin penguar lojën.
“Një person shtesë në fushën e lojës, sikurse një top shtesë, zakonisht konsiderohet problem nëse e pengon lojën, kundërshtarin apo zyrtarët e ndeshjes."
