Fonseca pret më shumë nga Rafael Leao

Në konferencën për shtyp para ndeshjes mes Milanit dhe Atalantës, trajneri i kuqezinjve, Paulo Fonseca, ka thënë se pret më shumë nga ylli i skuadrës, Rafael Leao.

Kuqezinjtë vizitojnë Atalantën në një ndeshje kyçe të Serie A-së të premten.

Leao shënoi një gol në fitoren 6:1 të Kupës së Italisë ndaj Sassuolos të martën dhe ka kontribuar në 10 gola këtë sezon.

Megjithatë, Fonseca pret edhe më shumë nga bashkëkombasi i tij.

"Unë besoj se Rafa ka vend për përmirësim," tha ai.

“Ai ka bërë mirë në ndeshjet e fundit, edhe për sa i përket angazhimit në mbrojtje, por unë nuk jam plotësisht i kënaqur. Mendoj se Rafa ka cilësinë për të bërë më shumë, dhe mendësia e Rafas duhet të jetë të bëjë edhe më shumë. Ai ka shënuar pesë gola dhe duhet të mendojë se mund të shënojë 20. Kur kemi një cilësi, duhet të jemi vetëkërkues; Mendoj se kjo është ajo që Rafas i duhet. Mos jini kurrë të kënaqur dhe jini ambicioz për të bërë gjithnjë e më shumë. Ai është në rrugën e duhur, por nuk mund të ndalet tani.”

Leao iu përgjigj kritikave nga media të mërkurën duke postuar një intervistë të vjetër të Zlatan Ibrahimovic në Instagram.

Portugezi ka tre gola dhe katër asistime në 12 paraqitje në Serie A këtë sezon.

Gjatë konferencës së tij për shtyp para ndeshjes, Fonseca shtoi se "asnjëherë" nuk është një moment i mirë për t'u përballur me Atalantën, e cila ka fituar tetë ndeshje radhazi në ligë, duke shënuar 26 gola dhe ka pranuar vetëm katër.

'La Dea' është vetëm një pikë poshtë liderit të tabelës Napoli dhe është e pamposhtur në Ligë të Kampionëve.