Dani Alves thotë se ka qenë i dehur natën për të cilën dyshohet se dhunoi seksualisht një grua
Ish-reprezentuesi i Brazilit, Dani Alves, për herë të parë para gjyqit e ka pranuar se ka qenë në gjendje të dehur në natën të cilën akuzohet për sulm seksual ndaj një gruaje, siç kanë informuar burimet gjyqësore për agjencinë e lajmeve EFE.
Nëse pranohet si një faktor lehtësues kur çështja shkon në gjykatë në shkurt, mund të çojë në një ulje të dënimit në rastin e një ndëshkimi.
Avokati i Alves, Inés Guardiola, ka argumentuar se niveli i dehjes së Alves dëmtoi aftësinë e tij njohëse dhe e la atë të pavetëdijshëm për veprimet e tij.
Është hera e pestë që Alves e ndryshon historinë e tij që kur u arrestua janarin e kaluar me akuzën e sulmit seksual të një gruaje në një klub nate në Barcelonë më 30 dhjetor 2022.
Fillimisht ai u shpreh se nuk e njihte viktimën. Ai më vonë tha se e kishte takuar gruan në banjën e klubit por se asgjë nuk ndodhi.
Ish-mbrojtësi i Barcelonës dhe Paris Saint-Germain, kur iu shfaqën prova biologjike, ndryshoi versionin e tij të ngjarjeve, duke thënë se ajo kishte kryer në mënyrë konsensuale seks oral ndaj tij.
Prillin e kaluar, pas rezultateve të analizave të mëtejshme biologjike, Alves tha për herë të parë se kishte kryer marrëdhënie seksuale me gruan, duke thënë se ishte konsensuale dhe se kishte gënjyer për të fshehur tradhtinë ndaj gruas së tij.
Alves, 40 vjeç, ka qenë në burg parandalues pa kusht që nga arrestimi i tij një vit më parë. Kontrata e tij me klubin e Liga MX Pumas UNAM, klubi ku ai iu bashkua pasi u largua nga Barça në qershor 2022, u ndërpre pasi ai u ndalua.
Ai do të dalë në gjyq 5-7 shkurt në një gjykatë në Barcelonë.
Prokurorët e shtetit po kërkojnë një dënim me nëntë vjet burg. Avokatët që përfaqësojnë gruan duan që ai të kalojë 12 vjet pas hekurave. Ata gjithashtu kërkojnë urdhra ndalimi për Alves pas burgimit dhe që ai të paguajë dëmshpërblim në vlerë prej 150,000 euro(163,605 dollarë) për gruan.
Sipas ligjit spanjoll për pëlqimin seksual të miratuar vitin e kaluar, akuza për sulm seksual përfshin një gamë të gjerë krimesh nga abuzimi në internet dhe përdhunimi, secila me dënime të ndryshme të mundshme. Një rast përdhunimi mund të dënohet maksimalisht prej 15 vjetësh.
