Cremonese shkakton befasi, e eliminon Napolin dhe kualifikohet në çerekfinale të Kupës së Italisë

Napoli nuk ka vazhduar formën e mirë nga kampionati italian edhe në Kupën e Italisë, pasi është mposhtur nga Cremonesen në 1/8 e finales, me anë të penalltive, pasi fitues nuk kishte gjatë 120 minuta lojë.

Pasi demoloi Juventusin para katër ditësh në Serie A duke e mposhtur thellësisht 5:1 dhe duke rritur edhe më shumë epërsinë në renditjen tabelore, në Kupën e Italisë hasi në vështirësi të madhe.

Futboll / Napoli me Rrahmanin drejt titullit kampion, shkatërron Juventusin 5-1

Sa i përket ndeshjes, kundërshtari, Cremonese, i doli kundërshtar më i vështirë seç prisnin napolitanët, duke parë se po takoheshin vendi i parë dhe i fundit i Serie A-së.

Ishte skuadra që u inkuadrua këtë vit në Serie A, ajo që shënoi e para. Charles Pickel e kaloi Cremonesen në epërsi 1:0 në minutën e 18-të.

Napoli reagoi shpejt me dy gola, për të kthyer gjithçka në të mirë të saj. Fillimisht ishte mbrojtësi Juan Jesus që shënoi për 1:1 në minutën e 33-të.

Tre minuta më vonë shënoi Giovanni Simeone për epërsinë e parë të Napolit në ndeshje.

Kur ndeshja po shkonte drejt fundit dhe mendohej se Napoli e përfundoi ndeshjen brenda 90 minutave, kështu nuk menduan kundërshtarët, ku me anë të Felix-Afena Gyan barazuan në 2:2, tre minuta para se të përfundonte koha e rregullt, dhe si rrjedhojë ndeshja shkoi në vazhdime.

Në vazhdime, Cremonese mbeti me një lojtar më pak në fushë, pasi Scernicola mori kartonin e dytë të verdhë në minutën e 100-të.

Edhe pse për 20 minuta skuadrat nuk ishin të barabarta numerikisht, rezultati vijoi të mbetej i njëjtë dhe për të përcaktuar fituesin u nevojitën penalltitë.

Në penallti, Cremonese u tregua më e saktë, për të fituar 5:4 dhe i vetmi që gaboi nga pika e bardhë ishte Lobotka në serinë e katërt për Napolin.

Cremonese do të takohet me Romën në çerekfinale të Kupës së Italisë më 1 shkurt.