Barcelona me vështirësi e eliminon skuadrën e ligës së tretë spanjolle, kualifikohet në çerekfinale të Kupës së Mbretit

Ndonëse në një moment ishte duke humbur, Barcelona është rikthyer për të fituar ndaj skuadrës së ligës së tretë spanjolle, Unionistas, me rezultat 3:1, për të kaluar në çerekfinale të Kupës së Mbretit.

Edhe pse dy nivele më poshtë, vendasit nuk u treguan aspak inferior në këtë takim, duke pasur disa raste shënimi, me Barcelonën që ishte vetëm më konkrete, por jo shumë më e mirë.

Të parët që kaluan në epërsi ishin Unionistas, kur mesfushori Alvaro Gomez shënoi për 1:0 në minutën e 31-të, i asistuar nga Serrano.

Barcelona reagoi shpejt. Në minutën e fundit të pjesës së parë, ishte Joao Felix që asistoi për Ferran Torres, i cili shënoi për ta barazuar rezultatin në 1:1.

Katalunasit në pjesën e dytë shënuan edhe dy gola për të siguruar fitoren ndaj skuadrës vendase.

Në minutën e 69-të Jules Kounde e çoi skuadrën e Xavi Hernandezit për herë të parë në epërsi, kur shënoi për rezultatin 2:1.

Teksa për rezultatin përfundimtar 3:1 shënoi Alejandro Balde në minutën e 73-të, me Kounden që ishte në rolin e asistuesit.

Barcelona rikthehet te fitoret dhe me këtë rast kualifikohet në mesin e tetë skuadrave më të mira në Kupë të Mbretit, teksa rrugëtimi i suksesshëm për Unionistas përfundon këtu.