Antony pranë kalimit te Man Utd – Thotë se nuk mund të përkushtohet te Ajaxi deri në qartësim të situatës

Anësori i Ajaxit, Antony, ka lënë të kuptohet se dëshiron të largohet nga klubi mes interesimit të vazhdueshëm të Manchester United për të. United ka ndjekur sulmuesin brazilian që nga qershori dhe tashmë ka parë dy oferta të refuzuara nga kampionët holandezë për të.

Trajneri i djajve të kuq, Erik ten Hag, e kishte stërvitur më parë sulmuesin e talentuar në kohën sa ishte në Ajax dhe tani kërkon që të ribashkohet me të, teksa ai vazhdon rishikimin e skuadrës pas fillimit të tmerrshëm në Premierligë.

Antony i përgjigjet raportimeve

Në një intervistë për De Telegraaf, Antony deklaroi se do të marrë një vendim për të ardhmen e tij vetëm pasi të zhvillojë diskutime me njerëzit e afërt të tij dhe klubin.

Ai tha: “Ajo që mund të them tani është se dua të marr vendimin e duhur me familjen time, partnerët e biznesit dhe Ajaxin, gjë që është e mirë për të gjithë. Në fund, Zoti e përcakton të ardhmen time.”

I pyetur nëse ka për qëllim t'i përkushtohet Ajaxit, Antony thotë: “Jo, të jem plotësisht i sinqertë, nuk mundem. Tani jam i përqendruar për të luajtur futboll dhe të gjitha çështjet i kam lënë në duart e menaxherëve dhe vëllait tim. Ata do të më këshillojnë se çfarë është më mirë për mua"

Sa duhet Manchester United të paguajë që të sigurojë shërbimet e Antonyt?

Oferta e fundit e United për Antony-n u raportua të ishte rreth 80 milionë euro, por kjo ende ishte disi më pak se vlerësimi i Ajax-it për lojtarin, i cili ka tre vjet të mbetura në kontratën e tij aktuale.

Është sugjeruar se ata do të jenë të gatshëm të pranojnë një ofertë prej rreth 90 milion euro, pasi ata shohin anësorin e Chelseat, Hakim Ziyech, si një zëvendësues të mundshëm.

Raportimet në Holandë të Premten pohuan se Antony tani po stërvitet vetë pasi ai shtyn për një largim nga klubi dhe është ende e paqartë nëse ai do të luajë kundër Sparta Rotterdam të dielën.