Ish-këshilltari i Kurtit: Ligji parasheh ndalim të pagës, sindikatat t’ua paguajnë rrogat grevistëve

Punëtorët e sektorit publik kanë hyrë në greëv pas ftesës së Bashkimit të Sindikatave të Pavarura të Kosovës. E ndaj kësaj, ka reaguar Qeveria e Kosovës, më konktretisht disa nga Ministrisë e saj, duke kërkuar listat e grevistëve. Madje, ata kanë paralajmëruar pezullim të pagave për grevistët.

Ndaj kësaj çështje kanë reaguar të gjitha partitë opozitare dhe sindikatat, duke e quajtur këtë qasje si skandaloze.

Por, ish-këshilltari i kryeministrit Albin Kurti, Durim Berisha, në një prononcim për gazetën Nacionale, ka theksuar se Ligji aktual për Greva, përfshirë plotësimin dhe ndryshimin e tij, parasheh pezullimin e pagës për grevistët.

“Sipas Ligjit për Greva (përfshirë Ligjin për Plotësimin dhe Ndryshimin e tij) gjatë Grevës pezullohet marrëdhënia e punës. Ligji përdorë formulimin pezullohen të drejtat nga Kontrata e Punës, përfshirë e drejta në pagë.”, tha ai për Nacionale.

Tutje, Berisha, që është ekspert i së drejtës kushtetuese, ka theksuar se kufizimi është paraparë me ligj, ashtu siç e kërkon edhe Kushtetuta e Kosovës.

“Sipas Kushtetutës së Republikës së Kosovës, liria për t'u organizuar me qëllim që të mbrohen interesat e anëtarëve të një sindikate, mund të kufziohet me ligj. Në rastin konkret, ky kufizim është i paraparë me ligj.”, komentoi z.Berisha.

Juristi Berisha ka treguar edhe praktikat në Evropë, në lidhje me pagesat e grevistëve, të cilat sipas tij bëhen nga sindikatat përkatëse.

“Në shtetet e BE secili grevist kompensohet gjatë periudhës sa zgjatë greva, nga sindikata të cilës i takon dhe e cila e ka organizuar grevën, sepse buxheti i sindikatave nuk është aty vetëm për të paguar bartësit e funksioneve në sindikatë.”, përfundoi Berisha.

Kujtojmë që nga sot, sektori publik ka hyrë në grevë me kërkesën për shtesa prej 100 euro deri në miratim të Ligjit për Paga.