Zoran Todiq mohon se është shtënë drejt KFOR-it, ngre pretendime tjera
Ish kryetari i komunës së Leposaviqit, Zoran Todiq, ka komentuar zhvillimet e fundit të mbrëmshme ku u raportuan të shtëna ndaj KFOR-it. Ai i ka mohuar këto raportime.
“Pas incidentit në komunën e Zubin Potokut, tensionet u rritën edhe në komunën e Leposaviqit. Megjithatë, populli është i vendosur të qëndrojë në këtë luftë dhe është i vendosur të luftojë për një të ardhme të sigurt në këto zona,” – u shpreh Todiqi për TV Pink.
Ai ka pretenduar se në stacionin policor janë futur armë (me tyta të gjata), snajperë etj. Dhe kjo sipas tij tregon (sic) “qëllimet e Qeverisë nga Prishtina.”
Todiq ka thënë se mes popullit serb në Kosovë tashmë ka unitet, që përkthyer me gjuhën tonë nënkupton nënshtrim ndaj politikës së Vuçiqit.
“U krijua uniteti, i cili ishte shumë i nevojshëm. Ne nuk kemi çfarë të kërkojmë nga institucionet e Kosovës kur marrim vetëm dhunë dhe (armë) me tyta të gjata prej tyre. Kësaj radhe s’ka asnjë koncesion, kjo është Serbia për ne...” – vazhdoi z. Todiq.
