Vonesat para gazetarëve, Nagavci: Qeveria ka obligime
Ministrja e Arsimit, Arbërie Nagavci i ka dalë në mbrojtje kolegut të saj nga ekzekutivi, Hekuran Murati, lidhur me vonesën e tij para gazetarëve, gjë që detyroi këta të fundit ta braktisin konferencën.
Sipas Nagavcit, qeveria ka mbajtur edhe një tjetër mbledhje me dyer të mbyllura, ndërsa pohoi se zëdhënësi i informoi gazetarët për vonesën.
Gjithashtu, e parja e arsimit në vend shtoi se është e rëndësishme të bashkëpunojnë, në mënyrë që informatat të përcillen te qytetarët.
“Mendoj që është e rëndësishme që të kemi bashkëpunim, është e rëndësishme që informatat tona të përcjellën tek qytetarët dhe po ashtu është e rëndësishme për mediat që të marrin informata dhe të i transmetojnë.
Si tek rasti i Qeverisë, pas përfundimit të mbledhjes vazhduam mbledhjen edhe pak me dyer të mbyllura, por për këtë zëdhënësi i Qeverisë, Përparim Kryeziu i njoftoj mediat dhe ju kërkoj falje dhe mirëkuptim dhe ju dha garanci që nuk do të përsëritet një gjë e tillë sepse vonesa jonë nuk ishte për shkak të neglizhencës por vazhdimit të bisedave.
Ju e keni parasysh se Qeveria ka detyra e obligime, në rastin konkret ne nuk i neglizhuam por vazhduam mbledhjen”, ka thënë Nagavaci në Kanal10.
