Takimet me gazetarë e shoqërinë civile, LDK i bën të ditura 7 pikat për të dalë nga kriza

Kryetari i Lidhjes Demokratike të Kosovës, Lumir Abdixhiku pas inciativës së tij në lidhje me gjendjen në vend, ka mbledhur sot shoqërinë civile.

Përmes një komunikate për media, LDK ka cituar deklaratën e Abdixhikut, i cili ka thënë se kjo nuk është nismë partiake, por përtej saj.

”Nuk shtrohet çështja nëse je me idenë e Kosovës sovrane, ose je me miqësinë transatlantike. Kjo kundërti nuk ekziston, përveç në kokën e Kurtit. Sovraniteti i Kosovës, pavarësia e Republika jonë, madje edhe demokracia, janë të ndërtuara bashkë me aleatët tanë, e jo kundër tyre. Por sot ne nuk flasim thjesht për miqësinë e aleancën. Ka një çështje edhe më të thellë e më urgjente me të cilën përballemi: Mungesa e vizionit, qëllimit, gatishmërisë e guximit të Kurtit për t’a dërguar Kosovën në një stad të avancuar sovraniteti” – ka thënë kryetari Abdixhiku.

Po ashtu, LDK bën të ditur se pas takimit me shoqëritë civile dhe OJQ-të, Abdixhiku ka paraqitur edhe shtatë pikat e kësaj partie, pas situatës së krijuar.

7 pikat e LDK-së për krizën në vend:

1. Së pari, me qëllim të shtensionimit të situatës në territorin te saj, Kosova duhet të angazhohet drejt organizimit të zgjedhjeve të reja në katër komunat veriore, me qëllim të sigurimit të legjitimitetit të plotë përfaqësues qytetar, legjitimitet që nuk eshte arritur nga pjesëmarrja e ulët në zgjedhjet e jashtëzakonshme të datës 23 prill 2023. Në këtë drejtim, Lidhja Demokratike e Kosovës konsideron se një marrëveshje politike, në mes të pjesëmarrësve paraprak në procesin zgjedhor, përkatësisht të dy partive pjesëmarrëse (LVV dhe PDK) dhe të katër kryetarëve të zgjedhur, për dorëheqjen me marrëveshje politike të këtyre të fundit, do të niste procesin e zgjedhjeve të jashtëzakonshme brenda periudhës 45-ditore; periudhë e mjaftueshme për shtensionim të situatës dhe rikthim të rendit dhe ligjit.

2. Gjatë periudhës 45-ditore, Republika e Kosovës dhe komuniteti ndërkombëtar në veçanti, të angazhohen për pjesëmarrjen e serbëve lokal në procesin e ri zgjedhor; duke respektuar në plotni kornizën ligjore dhe zgjedhore të Republikës së Kosovës; si parakusht i përmbushjes faktike të obligimeve ndërkombëtare të Kosovës.

3. Në këtë periudhë, Republika e Kosovës duhet të ndërtojë një ekip me ekspertët më të mirë vendorë dhe ndërkombëtarë, të së drejtës juridike, kushtetuese, ekspertëve të pushtetit lokal, të ekonomisë, arsimit e shëndetësisë, për nisjen e hartimit të draft-statutit të Asosciacionit, si obligim ndërkombëtar i pakapërcyeshëm i shtetit tonë. Draft-statuti duhet të jetë në përputhje të plotë me vendimin e Gjykatës Kushtetutuese të Kosovës dhe në përputhje të plotë me frymën kushtetuese të Kosovës, si dhe me karakterin unitar të shtetit.

4. Republika e Kosovës ndërton ekipe diplomatike profesionale e me përvojë, të cilat dërgohen menjëherë në kryeqendrat botërore për të riparuar marrëdhëniet e pothuajse të rrënuara të Kosovës në arenën ndërkombëtare, sikurse dhe për të kërkuar shfuqizimin e masave sanksionuese ndaj Republikës së Kosovës.

5. Kosova kërkon zotimin e Brukselit, si ndërmjetësues, nën garancitë e Shteteve të Bashkuara të Amerikës, për zbatimin e detyrimeve të marrëveshjeve të arritura me Serbinë nga pala tjetër.

6. Në këtë periudhë dhe gjithë periudhën pas, organet e rendit dhe të ligjit, pra policia, gjykata e prokuroria, angazhohen në sigurimin e rendit dhe ligjit në veri të vendit, sikurse dhe mbajtjen përgjegjës të secilit që cenon apo që ka cenuar rendin, kushtetutshmërinë dhe sovranitetin e Republikës së Kosovës.

7. Republika e Kosovës angazhohet në rinisjen e proceseve anëtarësuese të Kosovës në organizata ndërkombëtare, përkatësisht anëtarësimin në Këshillin e Evropës, nënshkrimin e Partneritetit për Paqe me NATO-n, e anëtarësimin e në organizmat e sigurisë, me theks të veçantë në INTERPOL e EUROPOL; sikurse dhe angazhimin e plotë në Procesin e Berlinit.

Ky takim ishte i dyti me radhë pas takimit të parë me komnunitetin e gazetarëve dhe opinionistëve ndërkaq, në takimin e tretë do të marrin pjesë komuniteti i akadamikëve dhe intelektualëve të Kosovës si dhe diplomatë e ish-diplomatë të vendit tonë.