Sveçla i kthen përgjigje ambasadorit amerikan: E ka dhënë një opinion, ne bëjmë vlerësimet e duhura
Ministri i Punëve të Brendshme, Xhelal Sveçla ka reaguar në lidhje me deklaratën e ambasadorit amerikan në Kosovë, Jeff Hovenier, i cili shprehu shqetësimin se kushtet nuk janë të duhura për mbajtjen e zgjedhjeve në veri.
Në një prononcim para mediave, të shpërndarë nga medium lokal Mitropol, Sveçla është pyetur edhe për deklaratën e ambasadorit amerikan.
Ministri i Qeverisë Kurti deklaroi se ai ka dhënë një opinion, por institucionet bëjnë vlerësimet e duhura.
“Shumë mirë, ai e ka dhënë një opinion, ne e vlerësojmë, janë institucionet përkatëse që bëjnë vlerësimet e duhura…Ju kisha lut me e lënë me kaq, ka me pas konferencë shtypi shumë shpejt”, ka thënë ai.
Pas tensioneve të brendshme në veri të vendit, më konkretisht afër zyrave të KQZ-së atje, reagoi edhe ambasadori amerikan, Jeff Hovenier.
Ai dënoi dhunën e shkaktuar gjatë incidenteve të djeshme në veri të Kosovës, ku u dëgjuan shumë shpërthime pas përpjekjeve të autoriteteve kosovare për të organizuar procesin zgjedhor për zgjedhjet e parakohshme të 18 dhjetorit.
“Dhuna dhe intimidimi, përfshirë përdorimin e pajisjeve shpërthyese, dhe rrezikimin e jetëve nuk është asnjëherë metodë e duhur e protestës,”- u shpreh ai.
Hovenier më tej ka thënë se ShBA-të janë të shqetësuara se kushtet “nuk janë të duhurat që zgjedhjet të mbahen në fund të këtij muaji në veri të Kosovës. Siguria e të gjithë qytetarëve të Kosovës duhet të jetë prioriteti më i lartë."
The United States condemns those who employed violence during yesterday’s incidents in northern Kosovo. Resorting to violence and intimidation, including use of an explosive device, and endangering lives is never an appropriate method of protest, under any circumstances. 1/2
— Ambassador Jeff Hovenier (@USAmbKosovo) December 7, 2022
