“Shqipëria, partneri kryesor tregtar ”: VV-ja sulmon opozitën e analistë, por pse u rritën shkëmbimet tregtare?
Lëvizja Vetëvendosje ka vazhduar me sulmet ndaj partive opozitare në vend. Kësaj radhe partia në pushtet ka thënë se Shqipëria tash është partneri kryesor tregtar i Kosovës e Serbia ka pësuar rënie prej 50 për qind në tregun tonë. Nacionale më parë kishte treguar se pse janë rritur shkëmbimet tregtare me Shqipërinë.
Partia në pushtet – Vetëvendosje – ka paraqitur disa të dhënë duke thënë se “Shqipëria merr primatin karshi Serbisë si partnere tregtare e Republikës së Kosovës”.
VV-ja ka thënë se opozita e ekspertët e tyre të ekonomisë dhe analistët flsinin për rekordin e mallrave të Serbisë në Kosovës.
E për këtë VV-ja ka sulmuar opozitën e analistët duke thënë se ata dëshiron që brenda natës të rregullohen ato çka i kanë bë për 20 vjet.
“E mbani mend opozitën, i mbani mend ekspertët e tyre të ekonomisë, po edhe ata nëpër studio televizive se si çdo natë flisnin për rekordin e mallrave të Serbisë në Kosovë. Ata donin që brenda natës të rregullohen ato çka i kanë bë për 20 vjet.” – thuhet në shkrimin e VV-së.
Më tej, VV-ja pretendon që me Qeverinë Kurti, Kosova po shkon drejt pavarësimit ekonomik.
“Dhe ja ku jemi, për herë të parë dhe kaq shumë vjet pas luftës Serbia e ka humbur tregun për 50% në Kosovë, ndërkohë që e para është Shqipëria e pas saj Maqedonia e Veriut. Qeveria Kurti, me politika të drejta e hapa të sigurt drejt pavarësimit ekonomik.” – ka shkruar VV-ja.
Pse janë rrit shkëmbimet tregtare me Shqipërinë?
Ky është një shkrimi që Nacionale e publikoi para disa jave dhe që shpejgon arsyet e rritjes së importeve nga Shqipëria.
Shkëmbimet tregtare mes Kosovës dhe Shqipërisë kanë shënuar rritje të ndjeshme në krahasim me vitet e kaluara.
Për gati 71 milionë euro është rritur vlera e produkteve nga Shqipëria të importuara në Kosovë.
Nga 255.3 milionë që ishte në vitin 2022, në vitin 2023 vlera e importeve u rrit në 326 milionë euro.
Po ashtu, edhe eksportet nga Kosova për në Shqipëri patën rritje të ndjeshme.
Sa e çka importuam nga Shqipëria?
Gjatë viti 2022, Kosova kishte importuar nga Shqipëria mallra me vlerë 255.3 milionë euro, ndërkaq në vitin 2023 kjo vlerë u rrit për gati 71 milionë euro apo në total prej 326.2 milionë euro.
Ndërsa sa i përket eksportit nga Kosova në Shqipëri në vitin 2022 vlera e eksporteve ishte 100.7 milionë euro, ndërsa në vitin 2023 vlera e eksporteve ishte 112.8 milionë euro.
Sipas një publikimit të Institutit GAP, shufrat e çelikut ishin produktet më të importuara nga Shqipëria në Kosovë gjatë vitit 2023 me vlerë prej 119.36 milionë euro.
Çimento, energjia elektrike, bitum nafte e fasada janë produktete e tjera më të importuara.
Ndërkaq sa i përket eksporteve, birra ishte produkti më i eksportuar nga Kosova në Shqipëri me vlerë prej 12.26 milionë euro.
Pijet freskuese, mbetjet ferrike, mbetjet alumini dhe produktete e tjera çeliku, përbëjnë pjesën tjetër të eksporteve.
Kujtojmë se Qeveria e Kosovës kishte vendosur masë të sigurisë ndaj produkteve nga Serbia pas kidnapimit të tre policëve kosovarë në vijën kufitare me Serbinë.
Si shkak i kësaj, vlera e importeve nga Serbia kishte shënuar rënie dhe duket që ka ndikuar edhe në rritjen e importeve nga Shqipëria dhe vendeve të tjera.