Shkurt e shqip: Çka thanë prej Presidentes e deri te Ambasadori i ShBA-ve pas Ohrit?

Duket se bota po ‘refuzon’ që të lëviz pas marrëveshjes së Ohrit. Jo shumë zhvillime, jo shumë fjalë, jo shumë veprime. Megjithatë, fjalë të çuditshme janë thënë gjithandej, e të cilat i mëshojnë paksa konfuzionit të krijuar. Çka thanë akterët kryesorë?

Fjala “vetëmenaxhim” është prej fjalëve më popullore të dy ditëve të fundit në Kosovë. Por, njeriu që vetëqeveris (në kuptimin, i vetëm qeveris gati gjithçka) nuk do të flas deri të enjten për përmbajtjen e marrëveshjes së Ohrit.

Megjithatë, kanë folur të tjerë akterë të rëndësishëm.

Vjosa Osmani: Serbia s’do ta zbatojë

Presidentja e Kosovës në një deklaratë të djeshme u shpreh që nuk priste që Serbia të zbatonte marrëveshjet e dakorduara në Ohër.

“Nga Serbia nuk kam asnjë pritje. Ata do të vazhdojnë të shkelin marrëveshjet e dakorduara, siç kanë bërë këto 12 vjet.” – tha ajo.

Më pas, presidentja Osmani akuzoi edhe Perëndimin për qasje akomoduese ndaj (sic) regjimit të Serbisë.

Glauk Konjufca: As gëk, as mëk

Deri në momentin që është shkruar ky artikull, kryetari i Kuvendit Glauk Konjufca s’ka bërë gëk. As mëk.

Jeff Hovenier: Të zbatojmë bashkë Asociacionin

Ambasadori i ShBA-ve në Kosovë, Jeff Hovenier, ka mirëpritur të dy marrëveshjet e arritura dhe e ka përmendur në mënyrë eksplicite Asociacionin e Komunav eme Shumicë Serbe.

“Ne kemi një kërkesë standarde që kryeministri të punojë me ne për zbatimin e Asociacionit,” – u shpreh ai.

Lumir Abdixhiku: Mashtrim

Edhe pse ShBA-ja shprehu “shqetësim” me retorikën e tij kundër marrëveshjeve, Abdixhiku s’u ndal. 24 pas mesnatës së 18 marsit, ai e quajti “mashtrues” kryeministrin Kurti.

“Një kauzë politike e rreme – që Kosovës i kushtoi tmerrësisht shumë – përfundoi sonte. Kushtet e vëna, fjalimet e thëna, qëndrimet e dhëna, thjesht u zhbënë.”

William Walker: S’e kuptoj Albinin

Miku i madh i Kosovës, po ashtu e komentoi marrëveshjen.

Në një prononcim, ai tha mes tjerash këto fjalë: “Nuk jam i sigurt që e kuptoj Albinin kur thotë se unë e nënshkruaj kështu siç është, ose dëshiron që ta nënshkruajë. Nëse aty nuk ka njohje, unë e shoh gabim që ai ta nënshkruaj.”

Daniel Serwer: S’ka reciprocitet

Profesori amerikan Daniel Serwer në një opinion të publikuar dje u shpreh i zhgënjyer me marrëveshjen duke thënë se po krijonte shumë konfuzion.

“Nuk ka as ndonjë shenjë të njohjes nga pesë shtetet mos-njohëse të BE-së,” – u shpreh ai, mes kritikash tjera të drejtuara kah BE-ja.

Ai u shpreh edhe se Aneksit i mungonte reciprociteti.

“S’ka reciprocitet. Serbia merr “vetëqeverisjen” e saj për qytetarët e saj në Kosovë por shqiptarët që jetojnë në jug të Serbisë nuk marrin asgjë të krahasueshme.” – shkroi ai.

Marko Gjuriq: Urra!

Në një postim të djeshëm, ambasadori serb në ShBA, shprehu gëzim të madh për marrëveshjen e Ohrit duke e falenderuar shumë presidentin serb Aleksandër Vuçiq.

“Rezultati i takimit në Ohër siguron interesat jetike të Serbisë në një moment të vështirë historik. Por, edhe më shumë se kaq...” – tha ai.

Lexuesit e Nacionales në Viber: JO

Lexuesit e Nacionales në Viber në mënyrë masive kundërshtuan Aneksin e Zbatimit me të cilin u pajtua Albin Kurti.

Në një sondazh të hapur nga administratori i grupit, 87% u përgjigjën me JO në pyetjen nëse do ta pranonin Aneksin.