Saktësia profetike e Armend Mujës: a ka shqisë të gjashtë?

Ora në mur pa bateri ia qëllon kohës dy herë në ditë, por Armend Muja është përjashtim edhe i përjashtimit të këtij rregulli. Saktësia e tij është saktësi në të mos-qëlluarit e gjërave. Kjo është edhe ajo çka Nacionale do t’ia përshkruajë Mujës për ‘shqisë të gjashtë’.

Të kthehemi në mars të 2021’ës kur Armend Muja kishte dalë nga teleanalist politik në deputet të Vetëvendosjes dhe ishte kthyer sërish në studio për t’ia bërë ‘spindoktorin’ partisë – tashmë pa mbulesë prej thjesht-analisti, por tamam i partisë. Po ia bënte parashikimin Vetëvendosjes në zgjedhjet lokale të tetorit 2021. Një muaj që nga zgjedhjet e 14 shkurtit 2021 kur Vetëvendosje kishte marrë 50,2% të votës në zgjedhje nacionale, ai e përllogariste që në zgjedhjet lokale Vetëvendosje do të fitonte 90% të komunave me shumicë shqiptare.

Në ‘Debat Plus’ ai e kishte ngjyer hartën kuq:

“këtu... këtu... këtu fiton Vetëvendosje”.

Përkatësisht 24 komuna nga 27 me shumicë shqiptare: përjashto këtu dhjetë komuna me shumicë serbe dhe një me shumicë turke. Ky ‘profetizim’ i Mujës, gjashtë muaj më vonë do të pjesëtohej me gjashtë. Vetëvendosje i fitoi vetëm katër komuna. Saktësia e Mujës u shndërrua në ekzemplar kombëtar të parashikimit.

Por, nuk është ky parashikim i parë dhe i vetëm. Muja ka bërë edhe një parashikim tjetër, edhe më ambicioz... jo në llogari më vetëm të Vetëvendosjes, por të vetë shtetit.

…

Kur nga ‘Fundi i Mjegullt’ – siç quhet lagja ku është vendosur objekti Departamenti i Shtetit në Uashingtonit – erdhi vendimi që Kosovës i shkëputet pa afat marrëveshja për “Dialogun Strategjik”, veprim ky i barazvlefshëm me një divorc bilateral, Armend Muja e pati parashikimin se pse po ndodh kjo, dhe jo vetëm. Por, edhe në çka përkthehet, si gjë e dobishme për Kosovën. Nuk e kanë me Kosovën, ishte përfundimi i gjykimit të Mujës, por me Serbinë. Sepse duan t’ia shkëpusin Serbisë “Dialogun Strategjik”, po ia shkëpusin edhe Kosovës. Dhe kjo, tha ai, “neve kështu na konvenon”.

“Amerika nuk po don të bëjë Dialog Strategjik tash me Kosovën sepse nuk po don ta bëjë edhe me Serbinë përderisa Vuçiqi i ka qitur tenkat në rrugë. Ose edhe me Kosovën edhe me Serbinë, ose me asnjërën. Në fakt, neve na konvenon më shumë kështu - me asnjërën!”, tha Armend Muja.

Dhe kështu, populli i Kosovës s’do të duhej të brengosej: sepse kjo ishte në dobinë e vendit, në të mirën e vendit, dhe në kuadër të interesit shtetëror.

Por, parashikimi i Mujës – ndonëse i pabazuar – u shemb si kështjellë prej zalli nga vetë Sekretari amerikan i Shtetit, Marco Rubio, i cili takoi dje Presidentin e Serbisë, Aleksandar Vuçiq, dhe tema ishte... Dialogu Strategjik ShBA – Serbi.

“Është mirë që e pashë përsëri Presidentin serb Aleksandër Vuçiç sot në Nju Jork. Diskutuam për Dialogun Strategjik që dy kombet tona do të nisin së shpejti dhe pjesëmarrjen e SHBA-së në EXPO 2027, të dyja mundësi për të forcuar më tej marrëdhëniet tona dypalëshe, ndërsa kërkojmë të ndërtojmë një të ardhme më të mirë së bashku”, shkroi Rubio.

‘Sanksionimi’ amerikan ndaj Kosovës

Një zyrtar i lartë i Departamentit të Shtetit të Shteteve të Bashkuara sërish ka konfirmuar për median “Koha.net” se qeveria e deputetit Albin Kurti ka shkaktuar pezullimin e Dialogut Strategjik me Uashingtonin.

Zyrtari amerikan ka shpjeguar se vendimi erdhi si rezultat i "kalimit të vijës së kuqe" nga ana e qeverisë kujdesta, veçanërisht përmes tentativave për të vijuar me përjashimin e partisë më të madhe të serbëve të Kosovës, Listës Serbe, dhe kësisoje të vazhdonte mospërfaqësimi politik i serbëve në veri të Kosovës.

“Gjëja e vetme që do ta theksoja veçanërisht, që për ne ishte më shqetësuese, ishin përpjekjet konkrete për t'ua pamundësuar qytetarëve të Kosovës, dhe në këtë rast serbëve të Kosovës, që të zgjedhin përfaqësuesit e tyre, si në kuptimin e gjerë ashtu edhe në pozitat udhëheqëse në institucione” – ka deklaruar zyrtari amerikan.

Sipas të njëjtit, situata nuk përbën një incident të izoluar, por reflekton një vazhdimësi të veprimeve që kanë thelluar tensionet dhe kanë rritur pasigurinë në rajon.

“Ka një varg veprimesh më gjerësisht, lidhur me veriun, që mendojmë se do të ishin destabilizuese dhe për të cilat kemi ngritur shqetësime. Por, mendoj se gjëja kryesore që duam të theksojmë janë veprimet që do t'ua mohonin qytetarëve të Kosovës të drejtën për të zgjedhur përfaqësuesit e tyre” – ka shtuar zyrtari i lartë amerikan.

Zyrtari ka përkujtuar se administrata amerikane kishte paralajmëruar autoritetin kosovar për pasojat e mundshme nëse qasja e qeverisë Kurti nuk do të ndryshonte.

“Ne ishim të qartë, gjithashtu, se do të kishte pasoja nëse kjo do të vazhdonte. Dhe në një moment e ndiem se nuk mund të prisnim më gjatë dhe se duhej të mbronim interesat tona” – ka thënë ai.