Osmani: As unë dhe as bashkëshorti im nuk kemi lidhje me rrethanat që shpien në vrasjen e mbrëmshme

Presidentja e Kosovës, Vjosa Osmani, ka reaguar ndaj shkrimit të Nacionales, i cili tregon se bashkëshorti i saj, Prindon Sadriu, ishte në dijeni për dhunimet e vajzave të mitura nga axha i tij, Sadri Sadriu, i cili dje është vrarë në Ferizaj.

Ajo e ka mohuar se Zotëria i Parë ka qenë në dijen për vepra e axhës së tij.

Në profilin e saj në “Facebooo”, Osmani ka shkruar se as ajo dhe as bashkëshorti i saj nuk kanw pasur lidhje dhe njohur me rrethanat që shpien në vrasjen e mbrëmshme.

“Pasi i kam njoftuar institucionet e sigurisë dhe jam në përgatitje e sipër të të gjitha mjeteve ligjore, po e bëj publik edhe këtë reagim ndaj publikimit të propagandës së paprecedentë që ka filluar Berat Buzhala dhe media e tij, gazeta online "Nacionale", e që po vazhdon edhe nga disa portale të tjera. I njoftoj qytetarët e Kosovës se asnjë njohuri e asnjë lidhje me rrethanat që shpien në vrasjen e mbrëmshme nuk kam as unë e as bashkëshorti im, e aq më pak njohuri për ndonjë rast dhunimi”, ka shkruar ajo.

Shefja e shtetit ka thënë se shkrimet e mediave për këtë çështje nuk janë të vërteta, duke kërkuar hetimin e tyre.

“Rrethanat që e kanë shtyrë Buzhalën dhe të tjerët në përhapjen e këtyre dezinformatave, kërkoj që urgjentisht të hetohen nga institucionet e sigurisë dhe ato të drejtësisë. Buzhala me "Nacionalen", dhe disa të tjerë, duke më implikuar mua dhe bashkëshortin tim në situata me të cilat nuk kemi asnjë lidhje të vetme, kanë qëllim të qartë të nxitjes së urrejtjes, e cila pastaj rezulton në dhunë. Kjo lidhje e rrejshme dhe e rrezikshme e krijuar nga këto portale, me vetëdije të plotë dhe me qëllim të rrezikimit të jetës sime dhe të familjes sime, ndërkohë që autoritetet kompetente po e hetojnë rastin, tregon tendencën e drejtpërdrejtë të tyre për rrezikim te jetës, duke na implikuar rrejshëm madje edhe në gjoja ndërhyrje në drejtësi”, ka shkruar Osmani.

Në pjesën e fundit të reagimit të saj, ajo ka kërkua nga organet e sigurisë që të ndriçohen rrethanat e vrasjes se djeshme.

“Ftoj sërish të gjitha organet e sigurisë dhe ato të drejtësisë që t'i hetojnë me prioritet të gjitha rrethanat e kësaj ngjarjeje e njëkohësisht edhe veprimet e këtij portali dhe portaleve të ngjashme që kanë qëllim të qartë për të rrezikuar jetën dhe nxitur urrejtje, e që këtë mision po shihet se e kanë edhe portalet e Serbisë”, ka shkruar Osmani.

Çka raportoi nacionale?

Gazeta Nacionale sot ka sjell detaje të reja për vrasjen e mbrëmshme në Ferizaj, ku një polic e ka vrarë Sadri Sadriun, i cili është axha bashkëshortit të presidentes Osmani.

Nga burimet e saj, Nacionale ka mësuar ‘motivi i vrasjes ishte dhunimi i dy motrave të dorasit, Festim Ramadanit, nga ana e viktimës, Sadri Sadriu, kur ato ishin të mitura’. Sipas burimeve tona, viktima ishte burri i tezës së dorasit.

Sipas burimeve të Nacionales, për rastin ishte i informuar bashkëshorti i Presidentes, Prindon Sadriu, por edhe vetë Presidentja Vjosa Osmani.

Prindon Sadriu dhe Vjosa Osmani ishin futur edhe në një grup komunikimi në Facebook, ku familja Ramadani kishte rrëfyer gjitha pretendimet e tyre për viktimën Sadri Sadriu.

Nga disa komunikime që ka parë Nacionale ndërmjet familjarëve Sadriu – Ramadani, aty shihet se në ‘chat-in’ e komunikimeve, ishte edhe Prindon Sadriu si dhe Vjosa Osmani-Sadriu.