Mjekët raportojnë për pesë të vrarë nga sulmet ajrore izraelite në Gazë
Sulmet ajrore izraelite në Gazë lanë të vrarë të paktën pesë palestinezë të hënën, thanë zyrtarët shëndetësorë.
Mjekët thanë se dy persona u vranë dhe disa të tjerë u plagosën, kur nga një sulm u godit një turmë njerëzish afër parkut publik komunal në qytetin Gaza, zonë e mbushur me familje të zhvendosura, raporton agjencia e lajmeve “Reuters”.
Më vonë të hënën, një sulm tjetër ajror izraelit goditi një automjet në lagjen Tel Al-Hawa, në pjesën perëndimore të qytetit Gaza, duke lënë të vrarë të paktën tre njerëz, shtuan mjekët.
Ushtria izraelite tha se në shënjestër të dy sulmeve ishin militantët e Hamasit, pa dhënë informata të mëtejme.
Në spitalin “Al Shifa”, qendra më e madhe mjekësore e enklavës, të afërmit dhe miqtë ua dhanë lamtumirën e fundit dy prej pesë burrave të vrarë të hënën para se t’i dërgonin në varre.
“Nuk ka armëpushim. Në Gazë nuk është as një ditë e mirë që nga 7 tetori (i vitit 2023)” – tha Amjad Abu Abdo, i afërm i njërit prej të vrarëve në sulmin e parë të hënën.
“Betohem se nuk flemë prej zhurmës së dronëve. Flemë të frikësuar se mund të goditemi” – shtoi ai.
Më shumë se 1.300 palestinezë janë vrarë në Gazë që nga hyrja në fuqi e një armëpushimi në tetorin e vitit të kaluar, sipas zyrtarëve shëndetësorë të enklavës. Ushtria izraelite thotë se katër ushtarë të saj janë vrarë gjatë kësaj periudhe.
