Prej madhërimi në degradim: Qe qysh Peci u shërbye me punën e Fahrije Hotit në një konferencë ndërkombëtare

“E kemi ndërtuar me lotë e sakrificë...duam kërkimfalje nga Faton Peci”.

Kjo ishte thirrja e djeshme për Ministrin e Bujqësisë, Faton Pecin nga drejtuesja e Kooperativës Bujqësore “Krusha”, Fahrije Hoti – thirrje të cilës Peci i është përgjigjur, por ama jo me kërkimfalje: për të mos thënë me ‘kripë në plagë’.

Kthim në kohë: gushti i vitit 2021.

S’i kishte bërë as pesë muaj ministër dhe tashmë ishte i titulluar të përfaqësonte vendin ndërkombëtarisht në sektorin që drejtonte: zhvillimin rural.

Ishte në Brdo pri Kranju të Sllovenisë dhe para vetes po u drejtohet rreth njëmbëdhjetë homologëve të vet: përveç atyre nga rajoni aty ishin përfaqësues nga Berlini, Parisi, Vjena e Budapesti.

Ishte Konferenca Ndërkombëtare Ministrore “Gratë dhe pozita e tyre në zona rurale”

Me ta do të miratonte “Deklaratë të Përbashkët” e mbushur përplot shqetësim kontinental për “gratë që po largohen nga zonat rurale” dhe ajo deklaratë – në tekst – ishte tejet përmbajtësore dhe zotuese.

Gratë në zonat rurale – e sidomos ata që bien në fushëdrejtimin e tyre: bujqësinë – do të gëzonin në atë deklaratë “mbështetje të madhe”.

Por, aty Peci homologët e vet nuk do t’i linte pa një tregim madhështor të marrë nga vendi i vet: atë të grave heroike të Kooperativës Bujqësore “Krusha” dhe me emrin, jetën e biografinë të vetë Fahrije Hotit.

Vështirë se do të gjente ‘match’ në këtë rrëfim, dhe salla do të duhej të mbante vesh.

Në postimin e asaj dite njoftoi në Facebook se përballë himologëve fjalën “e fillova me historinë e Fahrije Hotit, gruas heroinë nga Krusha”.

“Nuk kisha se si ta tregoja ndryshe shembullin e veprimtarisë së grave në bujqësi se sa përmes historisë së Fahrijes dhe të gjitha grave të Krushës”, ishte fjalia e bukur e Pecit.

Gratë fermere – apoteoza e të cilave për Pecin ishin “Gratë e Krushës” – për Pecin përbën rrëfimin bosht në atë Konferencë Ndërkombëtare Ministrore.

Por, krejt kjo u rrënua si kështjellë prej rëre.

Fast-forward nëntor 2024...

Peci e gjeti veten të ketë miratuar grante bujqësore për vëlla-e-dajë të komisionares të cilës i raporton: deputetes së Vetëvendosjes, Fitore Pacollit – dhe duke refuzuar grant m’u bash për KB “Krushën”.

Por, kjo u shndërrua në temë për helm-hedhje ndaj kësaj kompanie kur Peci çpluhurosi arkiva të minsitrisë për të paraqitur letra e dokumente se ish-udhëheqësit e kanë paditur m’u saktësisht Fahrije Hotin “për moskthim fondesh”.

Fahrije Hoti bëri thirrje për kërkim falje nga Faton Peci: ky i fundit iu përgjigj me një foto në një restorant në periferi të Prishtinës me Albin Kurtin; e të nesërmen me disa shfira për grantet bujqësore për Krushë “tokën e lagur me gjak”; por hiç asgjë për Fahrije Hotin.

“Jam njollos unë, janë njollos gratë e Krushës – kjo kurrë s’ka ndodhur – Ministri Faton Peci të dalë të kërkojë falje...ose që e mban egon e tij, do ta denoncojmë”.

Drejtuesja e Kooperativës Bujqësore “Krusha” në konferencën për media ku adresoi, siç tha ajo, “shpifjet” e bëra nga Ministri i Bujqësisë, Faton Peci, ka kërkuar që ky i fundit të reflektojë me kërkimfalje publike ndaj grave të Krushës.

“Unë nuk e di ku e paska gjetë ai atë dosje”, tha Fahrije Hoti, duke mohuar se ajo është paditur ndonjëherë dhe që të ketë marrë ftesë nga ndonjë gjykatë; derisa kërkoi nga Peci që edhe ta ofrojë atë dosje.

“Ministri Peci më ka përmend që Fahrije Hoti është e paditur në gjykatë. Përkundrazi, unë nuk kam marrë ftesë të atillë. Nuk kam marrë asnjëherë, asnjë ftesë, që unë jam e paditur që s’paskna kthy mjetet të ekzekutuara 2015-2017”, tha ajo në konferencë për media.