Ndryshe nga fqinjët, Kosova vazhdon të përballet me rritje marramendëse të çmimeve

Nga viti 2021 e deri në fund të 2025-ës, familjet në Kosovë janë përballur pa ndërprerë me barrën e rëndë të shtrenjtimit të kostos së jetesës.

Sipas të dhënave zyrtare të Agjencisë së Statistikave të Kosovës, niveli kumulativ i çmimeve shënoi rritje hiç më pak se 27.8 për qind përgjatë kësaj periudhe.

Kjo, pa përfshirë rritjen e shpejtë të çmimeve gjatë pesë muajve të parë të vitit 2026, periudhë kur Kosova po i afrohet me ritëm shqetësues krizës sëë ngjashme me atë të vitit 2022.

Goditja më e fortë e çmimeve u regjistrua në vitin 2022, me një normë prej 11.6 për qind, rritje që ishte kryesisht e importuar nga kriza globale si pasojë e luftës në Ukrainë.

Ndonëse vitet pasuese shënuan rritje më të moderuar, çmimet nuk pësuan asnjëherë rënie. Pasi u zbut gjatë viteve 2023 dhe 2024, inflacioni mori sërish hov në 2025-ën dhe sidomos 2026-ën.

Të dhënat për produktet ushqimore, dëshmojnë më së miri brutalitetin e rritjes eksponenciale të çmimeve përgjatë kësaj periudhe.

Mielli pësoi rritje drastike prej 54.5%, i ndjekur nga buka me 44.7%, vezët me 42.0% dhe qumështi me 37.8%. Ndërkohë, vaji ushqimor, pavarësisht një stabilizimi të lehtë në fund të kësaj periudhe, preku nivele rekord gjatë vitit 2022.

Kategoritë më të cenuara mbeten familjet me të ardhura të ulëta dhe pensionistët. Për ta, goditja është e dyfishtë, pasi pjesa dërrmuese e buxhetit të tyre shpenzohet pikërisht për këto produkte ekzistenciale, çka ishte theksuar në shumë raporte të Fondit Monetar Ndërkombëtar dhe Bankës Botërore.

Lajmi i keq i krizës së çmimeve është se, ndonëse tashmë ka stabilizim çmimesh në shumicën e vendeve evropiane dhe ato fqinje, Kosova është shkëptur ndjeshëm duke u bërë ndër vendet evropiane më inflacionin më të lartë përgjatë muajve të fundit.

Në muajin maj 2026, Indeksi i Harmonizuar i Çmimeve të Konsumit në Kosovë shënoi rritje prej 6.8% krahasuar me majin e vitit 2025.

Sipas të dhënave, rritja më e madhe e çmimeve u regjistrua te transporti, me 14.1%, pasuar nga strehimi, uji, energjia elektrike, gazi dhe lëndët e tjera djegëse, me 13.2%.

Rritje të ndjeshme pati edhe te pijet alkoolike, duhani dhe narkotikët me 5.6%, restorantet dhe shërbimet e akomodimit me 5.3%, si dhe ushqimet dhe pijet joalkoolike me 5.1%.

Çmime më të larta u shënuan gjithashtu në shëndetësi, mobilje dhe pajisje shtëpiake, kujdes personal, rekreacion, veshje dhe këpucë.

Për krahasim, në maj 2026 inflacioni vjetor në Shqipëri ishte 3.0%, ndërsa në Maqedoninë e Veriut 4.8%. Ndërkohë, të dhënat e fundit të publikuara për Serbinë dhe Malin e Zi i referohen muajit prill 2026, kur inflacioni ishte përkatësisht 3.3% dhe 3.8%.