Letra ku zotohet për themelimin e Asociacionit: Kurti servon kafen pa filxhan?
Albin Kurti i para një viti deklaronte se nuk mund t’i kërkohet formimi i Asociacionit të Komunave me shumicë serbe, pa njohje të pavarësisë së Kosovës nga Serbia. Njohjen, ai e sheh përmes marrëveshjes së arritur para më shumë se një viti, por jo edhe të nënshkruar. Albin Kurti i marsit 2024 ndërkohë, na vjen me nënshkrim të një letre ku ai zotohet për themelim të Asociacionit.
Gazeta Nacionale të shtunën publikoi një letër të cilën kryeministri i Kosovës, Albin Kurti, presidentja, Vjosa Osmani dhe kryeparlamentari Glauk Konjufca ia kanë nisur raportueses në Këshillin e Evropës, Dora Bakojanis.
Letra do të shkaktonte shumë reagime më pas, krejt kjo, për shkak të një zotimi. Në këtë shtojcë përmendet themelimi i Asociacioni sa më shpejt që është e mundshme. Kurti, Osmani e Konjufca e informojnë raportuesen për Kosovën në Këshillin e Evropës se do ta respektojmë besnikërisht listën e zotimeve të treguar në Shtojcën I.
“Në këtë kontekst, duke e marrë parasysh dhe mbi bazën e së drejtës kushtetuese të Kosovës, ne do të donim që ta shfrytëzojmë këtë mundësi për t’ju informuar se ne do ta respektojmë besnikërisht listën e zotimeve të treguar në Shtojcën I të letrës suaj të datës 21 mars 2024 pas bërjes së Kosovës shtet anëtar i Këshillit të Evropës..."
A po servohet kafja pa filxhan?
“…nuk mund të sjelli kafe, pa filxhan” – ishte kjo shprehja që Kurti më së shumti e përdorte për të arsyetuar mosformimin e Asociacionit të komunave me shumicë serbe, çështje kjo që i kërkohet thuajse çdo ditë.
Frazën e tij me filxhan e me kafe, Kurti e ka përmendur të paktën në tri paraqitje deri më tani. Pra, ai linte të kuptohej se nuk ka Asociacion, pa u njohur pavarësia e Kosovës.
“E kam thënë më herë këtë të kërkosh Asociacion pa e njohur pavarësinë e Kosovës është sikur të kërkosh kafe pa filxhan. Nuk muj të sjelli kafe pa filxhan.” – kishte thënë Kurti.
Kosova dhe Serbia kanë arritur një pajtim para një viti me Marrëveshjen Bazë, të cilën Kurti e kishe parë si njohje të ndërsjelltë de-facto.
Kjo marrëveshje, ani se ka kaluar njëvjetorin e parë, s’u nënshkrua kurrë. ShBA-ja dhe BE-ja në anën tjetër, në vazhdimësi kanë deklaruar që nënshkrimi ose jo, nuk ndikon te detyrimi për zbatim.
Kosova ndërkaq, ndodhet para një momenti tjetër historik – anëtarësimi në Këshillin e Evropës. Për t’u anëtarësuar në këtë institucion, Kurti hoqi dorë nga një qëndrim i mbajtur për gati një dekadë, që është kundërshtimi i vendimit se 24 hektarë tokë përreth i takojnë Manastirit të Deçanit. Kurti, ia dha tokat Manastirit të Deçanit.
Anise është rekomanduar anëtarësimi i Kosovës, në të njëjtën kohë, raportuesja Dora Bakojanis pritet të rekomandojë edhe një post-monitorim, e që lidhet, pikërisht me Asociacionin.
Këtu, shtrohet pyetja, a do ta servojë Kurti kafen pa filxhan, pra a do ta respektojë Asociacionin për hir të anëtarësimit në KiE?
