LDK me komunikatë zyrtare për kërcënimet: Të zhvillohen hetime të pavarura
Lidhja Demokratike e Kosovës ka dalur më një komunikatë zyrtare për kërcënimet që i janë bërë Kryetarit të kësaj partie, Lumir Abdixhikut dhe zyrtarëve të tjerë.
Komunikatën e ka shpërndarë deputetja e kësaj partie, Hykemete Bajrami, në të cilën thuhet se LDK-ja falenderon gjithë qytetarët e Kosovës në përgjithësi dhe anëtarësinë e saj në veçanti për përkrahjen dhe qetësinë e treguar deri më tani lidhur me informimin për planifikimin e atentateve ndaj kryetarit të LDK-së, Lumir Abdixhiku, dhe tre deputetëve të LDK-së.
Tutje, thuhet se LDK-ja falënderon partnerët ndërkombëtarë për mbështetjen e dhënë për këtë rast.
“LDK-ja u bën thirrje organeve kompetente që, në përputhshmëri me seriozitetin e situatës, në të cilën cak potencial janë katër përfaqësues të qytetarëve të Kosovës, të zhvillojnë hetime të pavarura dhe të ruajnë profesionalizmin, si dhe diskrecionin lidhur me këtë proces hetimor”, thuhet në komunikatë.
