Kurti: Gjithçka po shkon drejt normalizimit, pas zgjedhjeve të reja mund të ketë kryetarë të rinj
Kryeministri Albi Kurti ka thënë se situate në veri po shkon drejt normalizimit.
Pas një aktiviteti në komunën e Dragashit, ai ka treguar se kryetarët të rinj për katër komunat veriore do të ketë vetëm pas mbajtjes së zgjedhjeve të reja.
“Unë e kuptoj që në zgjedhjet që janë mbajtur në komunat në veri të Kosovës ka pasur dalje shumë të ulët dhe legjitimiteti është i vakët, mirëpo këta kanë pak legjitimitet e ata të tjerët kanë aspak legjitimitet. Andaj, pas zgjedhjeve të reja mund të ketë kryetarë të rinj. Nuk mund të ketë kryetarë pa zgjedhje të reja dhe zyrat e ndërtesat e komunave në Leposaviq, Zveçan e Zubin Potok janë asete të Kosovës”, ka thënë Kurti.
Ai ka thënë se tani është e nevojshme që të mos kemi protesta të dhunshme në veri.
“Situata në veri të Kosovës duhet të deeskalohet, për këtë është e nevojshme që të mos ketë më protesta të dhunshme, ata të cilët i kanë sulmuar ushtarët e KFOR-it, Policinë e Kosovës dhe gazetarët duhet të përballën me drejtësinë, e që në të ardhmen të kemi zgjedhje të lira, ku qytetarët e shprehin lirshëm vullnetin e tyre”, ka deklaruar Kurti, raporton KK.
