Hill takon Vuçeviqin, raportohet se ShBA është treguar e gatshme të ndihmojë në procesin e pajisjes së Forcave Serbe
Zëvendëskryeministri dhe ministri i Mbrojtjes së Serbisë, Millosh Vuçeviq, ka dhënë detaje rreth një bisede të realizuar gjatë ditës me ambasadorin e ShBA-së në Serbi, Christopher Hill.
Sipas Kosovo Online, dy zyrtarët kanë theksuar se vizitat e delegacioneve të larta të Shteteve të Bashkuara në Serbi, në periudhën paraprake tregojnë për forcimin e marrëdhënieve me Amerikën.
Raportohet gjithashtu se ministria e Mbrojtjes e Serbisë, ka thënë se në bisedën me ambasadorin amerikan është folur në veçanti lidhur me qëndrimin e përbashkët për domosdoshmërinë e konstituimit të Asociacionit të Komunave Serbe, si parakusht për vazhdimin e mëtejmë të procesit negociator.
Më tej Kosovo Online shkruan se, Hill ka vënë në dukje se ShBA-të janë të gatshme të ndihmojnë procesin e pajisjes së Forcave të Armatosura të Serbisë.
Lidhur me këtë çështje mësohet se është theksuar veçanërisht vizita që do të bëjë shefi i Shtabit të Përgjithshëm të Forcave të Armatosura të Serbisë, gjenerali Milan Mojsilović, në Gardën Kombëtare të Ohajos në Columbus dhe në Komandën e Përbashkët të Forcave të Armatosura të ShBA-së në Uashington.
Në deklaratën e kësaj ministrie po ashtu raportohet se Hill ka theksuar që ShBA-të janë partner i besueshëm i Serbisë.
