“Diktator në arrati”: Netanyahu ballafaqohet me protestues edhe në Londër

Kryeministri i Izraelit, Benjamin Netanyahu, u prit me bërtitje e fishkëllima nga qindra protestues pranë ndërtesës së Qeverisë së Britanisë të premten. Zemërimi i shumë njerëzve për reformën e tij në drejtësi e ndoqi Netanyahun edhe në Londër.

Kryeministri izraelit u përshëndet për dore me homologun britanik, Rishi Sunak, te hyrja e ndërtesës së qeverisë britanike, ndërsa protestuesit mbanin në duar flamuj izraelitë dhe bërtitnin: “Netanyahu, shko në burg, ti s’mund të flasësh për Izraelin.”

Skena në Londër i ngjau asaj në Berlin më herët këtë muaj, ku qindra njerëz u grumbulluan afër ndërtesës së Qeverisë së Gjermanisë për të protestuar kundër ndryshimeve në sistemin gjyqësor, raporton agjencia “Reuters”.

Netanyahu është ballafaquar me protesta për disa javë, pasi koalicioni i tij nacionalist i miratoi ndryshimet në sistemin e drejtësisë, të cilat do t’i siguronin qeverisë autoritet për zgjedhjen e gjykatësve dhe do t’i kufizonin kompetencat e Gjykatës Supreme për të shfuqizuar ligje.

Televizionet kishin pritur që ta incizonin fillimin e takimit mes Netanyahut dhe Sunakut, por, siç u duk, kjo procedurë u anulua të premten.

Para ndërtesës qeveritare, të rrethuar nga policia britanike e të kufizuar nga barrikadat, protestuesit valëvitën flamuj izraelitë dhe në duar mbanin pankarta në të cilat shkruhej “Diktator në arrati”, “Unë e dua Aparteidin” dhe “Nuk mund të shijosh një fundjavë në Londër, kur je duke rrëzuar një demokraci”.

SHBA / S’ka vizitë në Shtëpinë e Bardhë për Netanyahun, shtohet shqetësimi i ShBA-së

Izraelitët britanikë kanë marrë pjesë në disa protesta të mëdha në Londër në javët e fundit, duke u grumbulluar në organizimet e quajtura “Mbroje Demokracinë e Izraelit”.

Netanyahu pritet të takohet edhe me ministren e Punëve të Brendshme të Britanisë, Suella Braverman.