Arrihet marrëveshja për targa

Është arritur marrëveshja për targa. Këtë e ka konfirmuar kryediplomati evropian, Josep Borrell.

“Me kënaqësi ju njoftoj se kryenegociatorët e Kosovës dhe të Serbisë, nën lehtësimin e BE-së, kanë rënë dakord për masat, për të shmangur përshkallëzimin e mëtejshëm dhe për t'u përqendruar plotësisht në propozimin për normalizimin e marrëdhënieve mes tyre”, shkroi Borrell në Twitter.

Sipas kësaj marrëveshje, Serbia do të ndalojë lëshimin e targave, kurse Kosova do t'i ndërpresë veprimet e mëtejshme në lidhje me riregjistrimin e automjeteve.

"Serbia do të ndalojë lëshimin e targave me emërtimet e qyteteve të Kosovës dhe Kosova do të ndërpresë veprimet e mëtejshme në lidhje me riregjistrimin e automjeteve. Unë do t'i ftoj palët në ditët në vijim për të diskutuar hapat e ardhshëm. E falënderoj përfaqësuesin special Miroslav Lajçak palët për punën e palodhur", shtoi tutje ai.

Siç shkruan shefi i diplomacisë evropiane, ditëve të ardhme do të ketë edhe diskutime të tjera.

Bisedimet filluan gjatë ditës së sotme rreth orës 16:00, për të shkuar më pas në pauzë, një orë më pas, ku edhe filluan diskutimet e palëve me kryeqendrat.

Marrëveshjen e konfirmoi edhe ambasadori i Kosovës në Bruksel, Agron Bajrami.

Bajrami, përmes një cicërime në rrjetin social "Twitter" deklaroi se pas shumë orësh bisedime, palët gjetën gjuhën e përbashkët.

Tutje tha se tashmë i hapet rrugë marrëveshjes finale.

"Pas disa orësh, ne arritëm një objektiv: kemi marrëveshje. Tani bisedimet intensive për normalizim të plotë mund të fillojnë", tha Bajrami.

Gjithashtu, presidentja Osmani, pak çaste më parë shkroi rreth marrëveshjes, duke falënderuar fillimisht Ambasadën Amerikane në Kosovë për mbështetjen dhe angazhimin në arritjen e marrëveshjes.

"Dua të falënderoj ambasadorin amerikan në Kosovë, Jeff Hovenier dhe ShBA-në për angazhimin e tyre të vazhdueshëm për të arritur marrëveshje në Bruksel. Mbështetja e tyre për dialogun është e domosdoshme. Kosova është falënderuese".

Lajmi në përditësim